被問選特首 周凱旋:等我諗諗

維港投資創辦人兼「李嘉誠基金會」董事周凱旋在以色列接受傳媒訪問時，暢談對政治的睇法，被記者問及未來會否參選特首，周凱旋笑着反問記者：「你會唔會選我先？」記者紛紛和應示好，再問她會否參選特首，周凱旋再笑着反問：「我？你哋會唔會選我先？冇人要我嘅！」

被記者再追問，她就回答謂：「你知唔知依家一講參選，可能即刻會...」，她未有把話講清楚，但記者話會投她一票，第四次提問她選不選，她最後答案是「多謝你，不過回答唔到你呀，等我諗諗。」

周凱旋是出席「李嘉誠基金會」在以色列主辦的科技夾子營活動時接受訪問。消息傳出後，新城財經台的網站報道，據知李嘉誠已得悉有關訪問談及特首議題，認為周凱旋說會考慮參選純粹是開玩笑，而周凱旋亦已再三向傳媒重申，自己只是跟記者說笑。

  

另外周凱旋講到政改時話，個人希望政改通過，更應該全票通過，這樣國家會更加積極做好香港的選舉，積極游說能給予香港良好管治的人才出來參選。

周凱旋又話，若然通過政改方案，建立一個平台後，就會有人才出來競選，可以管理好香港。她講到雨傘運動，從學生角度思考並回答，「現時連平台都無，日日開電視都是嘈吵，講大話唔眨眼，不是只講一個人講大話，人人都講大話唔貶眼，細路仔唔信任都是好自然的事。你地唔厭咩，唔熄電視咩？你地寫都寫到厭啦，好似déjà vu(幻覺記憶)咁樣，大家又唔高興，好似是指定動作。」

Ariel

** 博客文章文責自負,不代表本公司立場 **

政府明天公布施政報告，Ariel到處索吓料，睇吓有冇石破天驚政策，特別喺土地房屋政策方面，呢啲似乎係香港人關心的主要問題之一，但聞說冇乜勁料。

  

其實坊間已經漏咗唔少料出來，其中一些措施包括將一啲公屋撥作居屋，俾綠表的人申請，他們成功買居屋後，就會放番出間公屋出來，增加公屋流轉。但這些政策並沒有令到房屋的總體供應上升，所以估計影響亦都有限。

 

官府的人私底下話，大家唔好期望在房屋、青年上流力等重大議題上，有好巨大的突破，其實依家政府有料有招，都會馬上提出公布。雖然有唔少人認為在佔中後，政府應該做啲嘢，但係政府中人認為好多嘢都唔係一時三刻可以做到出來。當然亦唔會留好多招，等到施政報告先出。Ariel 話佢地都好大力做期望管理。

 

官員話時代唔同咗，以前的社會比較靜態，重大政策都係等一年一度的施政報告同財政預算先推出，但依家社會對政府要求好高，有料就要馬上推，所以一直以來沿用做施政報告的做法，例如由各部門提出政策措施建議，夾成施政報告，慢慢淪為比較流水作業。

又例如施政報告公佈當日，有所謂閉門閱覽施政報告的程序，即係特首仲喺立法會宣讀施政報告時，政府設一個地方俾傳媒的較資深的記者閉門閱覽，各局同部門的官員在現場解畫，等特首讀完施政報告，就放人出來做嘢。呢種做法有啲過時，依家施政報告都冇乜石破天驚的內容，亦都唔係複雜都需要官員去解畫，所以呢啲閉門鎖死的安排，長遠來講都要檢討一吓。