政府在施政報告內試圖增加房屋供應以平抑樓價，由於沒有打壓樓市辣招，市民不太收貨，今早就有聽眾打電話去電台問特首CY，點睇施政報告出來之後，李四叔屬下樓盤加價三成，又話樓價要跌五成先至夠。特首似乎唔太識答四叔加價的問題，用唔太知道情況的回應遊走咗。
李四叔的恒基有個在粉嶺馬適路的樓盤逸峯，單位總數728伙，已經賣咗9成幾，餘下29伙貨尾單位，昨全線加價15至29%，實呎價升至14000多元，和2013年開售時平均實呎價不夠9000元比，貴咗5成以上。現價亦比同區屋苑二手價高4成。
加價後最便宜單位由440萬加到568萬，呎價12532元，以一個在馬適路實呎400幾的單位計，售價都好貴。 有人話發展商玩嘢，所以見施政報告出來後就加咁多價，但業界人士話，個盤只有29伙貨尾，數量咁少，可能揸數者見無新招打擊樓市，預期樓價升，咁少貨唔憂賣，咪加多啲價諗住拖長嚟慢慢賣，講唔定以加價作免費宣傳，無諗到「玩政府」咁複雜啩。
不過政界中人就話，施政報告的確無乜招打擊樓市，但財政預算稍後先至出，即使本來無招打樓市，若然樓價呢一個月升得急，加招嚟打擊都做得切，小心咁搞搞到財爺做嘢呀。
Ariel
** 博客文章文責自負,不代表本公司立場 **
施政報告在最關心的房屋問題上，主要在針對中階，在居屋上著墨，搞出居屋三級制。除咗傳統居屋外，仲加咗貴價居屋和平價居屋。
在平價居屋方面，傳咗好耐的將公屋轉作居屋計劃將出籠，賣俾綠表人士，以市值五折定價，即係比傳統居屋以市價七折定價便宜，早前盛傳試點是沙田水泉澳邨，但政府消息人士話，水泉澳邨後有斜坡，維修費貴，將來住戶難負擔，要另覓屋邨實現計劃。
另外貴價居屋就係將市建局的重建項目部份轉作居屋。由於市建局重建項目十分接近私樓的質素，所以售價不會是傳統居屋市價七折這樣便宜，樓價可能介乎傳統居屋與私樓之間。市建局想將啟德重建項目「煥然壹居」其中兩幢，變作新居屋出售，約有300個面積介乎500呎上下的單位。
政府顯然因為居屋數量不夠，所以打市建局主意，叫市建局拿多一點重建項目出來變居屋，所以將來這種市建局轉居屋項目不止「煥然壹居」，其他項目還陸續有來。
至於傳統賣7折的居屋，房委會在2015年度將預售2700個，2016年度預售2000個。而房協在2016年度就有1600個單位提供。長遠房屋策略希望每年有9000個居屋供應，而家計計數，2015年度傳統居屋只有2700個，加平價居屋加貴價屋居(總數未知)，可能只有4000多個，遠比目標低。而2016年傳統居屋3600個，加平價及貴價居屋可能有5000多個，比目標仍有好大差距。政府真係要左掘右掘，掘多啲居屋出來賣，先至可以滿足到需求。
