傑哥都係講政治啫!

特首CY到立法會為施政報告解話，公民黨黨魁梁家傑追問，特首在施政報告中點名批評港大學生會刊物《學苑》出版的兩份書刊，是將施政報告當作政治鬥爭的綱領，係政治報告，又話佢將港獨「偽命題」變成鞏固維穩，質疑特首是向中央虛報軍情咁。

CY馬上反彈，話梁家傑如果擔心特區政府虛報軍情，應爭取機會多與中央交流，但去年搞回內地交流梁家傑無去。他指中央對香港情況十分清楚，更反問梁家傑是否支持有關書刊提出的「香港獨立、香港自決」。

呢啲答問會有時幾悶，不過兩個人擦出火花，都幾好睇，傑哥逼問施政報告導言和結論是否特首親自寫，特首反追問傑哥是否支持有關書刊提出的「香港獨立、香港自決」，最後逼到傑哥補充答話:「如果香港民族論等如香港獨立論，我立此存照，我反對香港獨立。」CY成功逼到傑哥表態。

政壇八卦友有個各打五十的分析，話CY的確係出咗份政治報告，但係傑哥作為泛民飯盒會召集人，在施政報告公布前話，報告必須要包含梁振英下台、有真普選、重啟政改五步曲，因為報告不可能包括這幾項要求，因此泛民議員昨天在CY宣讀施政報告時離場抗議。

他對施政報告的要求一樣係只講政治啫。CY又係講政治，政治鬥政治，大家啱咀型呀。

Ariel

** 博客文章文責自負,不代表本公司立場 **

政府在施政報告內試圖增加房屋供應以平抑樓價，由於沒有打壓樓市辣招，市民不太收貨，今早就有聽眾打電話去電台問特首CY，點睇施政報告出來之後，李四叔屬下樓盤加價三成，又話樓價要跌五成先至夠。特首似乎唔太識答四叔加價的問題，用唔太知道情況的回應遊走咗。

李四叔的恒基有個在粉嶺馬適路的樓盤逸峯，單位總數728伙，已經賣咗9成幾，餘下29伙貨尾單位，昨全線加價15至29%，實呎價升至14000多元，和2013年開售時平均實呎價不夠9000元比，貴咗5成以上。現價亦比同區屋苑二手價高4成。

加價後最便宜單位由440萬加到568萬，呎價12532元，以一個在馬適路實呎400幾的單位計，售價都好貴。 有人話發展商玩嘢，所以見施政報告出來後就加咁多價，但業界人士話，個盤只有29伙貨尾，數量咁少，可能揸數者見無新招打擊樓市，預期樓價升，咁少貨唔憂賣，咪加多啲價諗住拖長嚟慢慢賣，講唔定以加價作免費宣傳，無諗到「玩政府」咁複雜啩。

不過政界中人就話，施政報告的確無乜招打擊樓市，但財政預算稍後先至出，即使本來無招打樓市，若然樓價呢一個月升得急，加招嚟打擊都做得切，小心咁搞搞到財爺做嘢呀。