四叔起青年單位有暗湧

恒基地產主席李兆基早前再提出捐地助青年人置業的計劃，其中大坑西新邨擬重建為「勤奮青年創業居所」最有創意，想提供5000個面積300方呎單位，每個售價一百多萬元，免首期，月供低至5500多元可做業主，幫「窮青年」圓置業夢，聽落非常吸引。

不過Ariel同知情人士傾過，話呢個計劃唔易落實，主要是居民安置問題。大坑西新邨是政府在1961年以特惠地價批予香港平民屋宇有限公司，發展私營廉租屋，1600個單位只剩下1300戶左右，由於地積比率未用盡，所以有收回千幾個單位，可以賣5000個單位的數字。

即使不說變成出售樓宇的補地價問題，單是安置居民就十分頭痛，現時大坑西新邨的1300戶主要是老人家，絕大部份要求原區或就近地區安置。四叔呢個計劃，益咗要置業的青年人，但要政府攞現有公屋出來安置。知情人士話，政府一年興建公屋量有限，特別市區公屋更稀缺，撥了1300個市區公屋單位出來，輪候公屋者有怨言。

再加上這5000個特別單位，也不是計入政府的居屋計劃之內，用政府條數，變成白白俾出公屋，也沒有居屋進帳，條數好難計。

呢單嘢李四叔同政府傾咗年幾，一直因為上述問題未傾掂，而李四叔亦只是平民屋宇公司董事之一，公司另一董事李國寶就話，計劃仍未落實，「這是四叔（李兆基）的想法，和我們傾過，但我們未做決定，很多事情要等政府，看看政府的想法如何。」可見單嘢仍有暗湧。

Ariel

** 博客文章文責自負,不代表本公司立場 **

民陣2月1日發起大遊行，主題係「唔要假民主，我要真普選」，搞手估計會有5萬人參與。

對泛民來講，搞呢次遊行相信係想延續人氣，動員多啲後生仔女出來做選民登記，估計年青人多傾向支持佔領，為今年稍後的區議會選舉舖路。

各方都唔似太緊張呢次遊行，有政壇人士分析，佔領行動佔咗79日，消耗咗泛民唔少力量，唔係話可以一時三刻可以大幅動員人士出來。估計呢次遊行少則幾千，多則幾萬，都係泛民的基本盤出來遊行，暫時社會大氣氛都不在此。

政界人士反而多關注民主黨有關何俊仁提出「辭職補選」的投票，影響可能仲大啲，早前黨內舉行座談會，意見主要分兩類，第一是有否需要辭職公投，擔心成效；二是即使要舉行公投，應在何時進行。民主黨內部有不同意見，有關決定會放到會員大會投票，相信通過的機會不低。假如實行，對泛民力量的重估會有啟示。