打阿里巴巴之假有無後台?

阿里巴巴老細馬雲近日當黑，公司周四公佈的第3季（至12月） 業績收入差過預期，令阿里股價單日急插8.8%，周五亦無反彈， 再跌0.8%。 國家工商總局出報告話淘寶上銷售的產品近三分之二係假貨， 指責阿里巴巴對網上售假商家態度偏軟， 阿里巴巴反駁國家工商總局的報告出錯， 呢場口水戰已搞到阿里巴巴好慘，再加上業績唔理想就慘上加慘。

馬雲早前因為阿里巴巴股價大升而成為亞洲首富， 曾多次表示成為首富不單不快樂，甚至「非常痛苦， 因為當你是世界最有錢的人，身邊所有人都是因為錢而接近你。」 佢今次如願以償。因為阿里巴巴股價大跌，持有阿里巴巴7.8% 股份的馬雲，至周四身家大蒸發130億港元， 已跌至亞洲富豪榜的第三位，落後於擁有2395億港元的李嘉誠( 彭博統計)，以及萬達集團老細王健林的2083億港元。

阿里巴巴的災難源於國家工商總局的打假報告， 現在的說法是工商總局去年夏季完成了關鍵的審查， 但為了唔影響阿里巴巴美國公開招股，所以沒有公佈結果。

當外界覺得工商總局當日好保護阿里巴巴， 我就覺得點解今天要公布有關報告？公布報告是一個無面俾的負面訊息，向阿里巴巴打假有無後台？

國家工商總局和阿里巴巴好像有點言歸於好，總局局長張茅昨天( 周五)在工商總局會見馬雲，雙方達成共識，將一同探索管理模式， 促進網路經濟健康有序發展。

同日晚上，國家工商總局發言人正式表態：1月28日工商總局網監司發佈的“白皮書”，實質是行政指導座談會會議記錄， 不具有法律效力。馬雲就表示，阿里巴巴將積極配合政府部門， 加大資金、技術等投入，加強原有專業打假團隊， 切實有效解決現實問題。

針對阿里巴巴的打假事件是否就此完結，還需拭目以待。

小鯊

** 博客文章文責自負,不代表本公司立場 **

睇《壹週刊》講鰂魚涌一間去年開業的甜品店「紅丸甜品」， 佢好有創意賣西瓜啫喱、懷舊可樂涼粉，熊貓飯團等。 去年一開店就成功，已經月賺四萬，但高潮過後， 近幾個月盈利大跌一半，老闆鄭偉彬(Leo)歸究佔中。 如今運動已完結，人流亦只輕微改善。

壹仔當然唔buy話佔中搞壞生意這一套，認為其經營模式有問題， 包括毛利太低，老闆周身刀無時間管鋪頭，大廚有離心之類。

但小鯊睇完呢篇報道， 才驚覺這兩個月有三四個做生意的大小老闆話生意難做， 原來並非單獨個案，都有一定普遍性。

有個做高級消費品的老闆睇法較深入，佢話呢啲叫「借傷成毒」， 唔好怪晒佔中，係個經濟已經有病，借佔中一搞，啲毒發晒出來， 無佔中都係死，不過死慢啲啫。

在佔中高潮，受影響地區生意停晒，附近地區都生意大減， 重災區生意少了六、七成係等間事，但高潮過後， 如今生意都係得番之前七、八成，即係唔見咗兩、三成生意， 唔好話生意跌唔多，好多生意純利都真係得兩成， 咁跌法足夠令生意由賺變蝕。

佢分析話，消費者在佔中期唔使開，好似買高級消費品， 唔買又無乜嘢噃，反正手頭唔係咁鬆，唔使慣就唔使算啦， 一下子就形成一個停止消費的慣性，若無佔中，最後都係咁， 不過流失得會慢啲、自然啲。

佢話高潮在兩三年前已到咗，當時啲客真係好豪， 佢唔係做遊客生意，但可能有太多人在大陸豪客身上賺咗大錢， 所以本地人好肯使錢，地產經紀特別豪。如今大陸打貪，豪客大減， 樓又加稅，陸客唔炒，賺大錢的人大量減少，消費唔起， 做生意要捱貴租捱貴人工就好惡頂啦。佢自己的旺區舖比10年前加 咗兩倍租，好快頂唔順要棄租。佢睇得淡啲， 話香港的商業週期開始向下啦。