政事
馬雲間阿里巴巴用10億在香港成立創業基金， 到底佢係為香港好還是為自己好，成為城中一個話題。
有高人拆局，話馬雲咁落力在香港做嘢，都有他自己的盤算， 唔係只益香港。董伯伯的團結基金搵馬雲撐場，馬雲願意嚟， 自有其數口。試想呢啲大老闆，本身忙到死，飛嚟香港講講座， 將來公司仲要在香港搞埋基金，學李超人話齋，你估真係好得閒咩。
高人估馬雲第一個來港搞嘢的理由仍然係財經。當日阿里巴巴因為「 同股不同權」問題，不能來港上市，去咗美國上，美國監管甚嚴， 佢而家要捱。但佢仲有隻支付寶未上市，會否留條後路再來香港？加上香港係金融中心，訊息發達，在這裏多點現身，收收風都無壞。
高人認為馬雲第二個來港搞嘢理由， 可能亦睇到香港搞科研商用化的潛力。一直有個說法， 話香港投資好多錢俾大學做研究，幾間大學亦擠身世界前列， 講科研如科大都好強，但只欠最後一步， 無將研究成果指向商業用途，所以馬雲這樣一搞創業基金， 若能盡吸香港最頂尖做科研的年青人，都係一條財路。 結論係呢個創業基金不純粹是公益項目。
Ariel
** 博客文章文責自負,不代表本公司立場 **
民陣昨日發動「唔要假民主、我要真普選」遊行，事前預計有5萬人 參加，但最後人數不如預期，民陣自己公布有1萬3千人參加， 警方指高峰時有8800人，港大民研鍾庭耀估計遊行人數有1萬2 千人，三個數字接近，合理估計有1萬人多一點參加。
人數少過民陣預期，民陣發言人陳倩瑩話，「 港人過去數月清晰表態反對人大8.31決議，如果梁振英覺得無5 萬人等於市民接受『袋住先』，同玩火自焚無分別」。 而學民黃之鋒就話人數符合期望， 料政府推出政改方案至立法會表決之間， 會爆發新一波公民抗命或佔領行動。
政界人士話，遊行人數得1萬左右，係合理賽果， 因為佔中搞咗咁耐，大家都有少少疲，從遊行前無人講無乜氣氛， 可以估到大約係呢種人數參加，比正常元旦遊行少。 但陳倩瑩亦講得啱，遊行人數少不等如接受袋住先， 仍有大量市民反對袋住先(雖然支持者略多少少)， 只不過不出來遊行而矣。
政界人士話，遊行人數少有兩種不同解讀，一種是暫時抖抖， 一種是永久心淡，前者如打仗，打完一場仗，又叫人上陣， 好難糾合到人馬，而且年青人覺得遊行無乜用，也不一定出來， 不如抖抖，但休養一會之後，又有大軍可以上陣。 後者是部份泛民支持者、特別是年紀較大者， 在上一役撲出來無功而還，變得比較心淡，所以不想再玩。 佢就認為兩種人都有，估計年青人抖抖又會出來， 不能假設政改方案投票前無大動蕩，後生仔多數會出來玩。
