問責官員全數缺席民主黨晚會

民主黨準備在2月27日搞佢哋的籌款晚會，地點係尖沙咀The One的皇府酒家。呢類俾面派對，都會邀約各方人等出席，包括問責官員，但Ariel收到風，問責官員將會全數缺席。

點解出現這樣情況，主要係去年民主黨向政府遞意見書，當時專門唔俾特首CY，就只係俾林鄭同財爺，意見書的信箋大大隻字寫住：「下台解困局、重啟五步曲、落實真普選」，開宗明義要特首下台。如今民主黨搞籌款晚會，如果政府問責官員出席，上台幫佢哋籌款，有少少違反咗政治倫理。

高官認為，民主黨打正旗號要特首下台，問責官員仲去捧場，咁係咪等同認同佢哋叫特首下台的目標呢？其次係民主黨傾緊支持何俊仁辭職搞公投，搞公投需要大量經費，部份要民主黨出，問責官員去咗，甚至上台幫佢哋籌款，籌到的錢將來又搞辭公投針對政府，咁樣唔係幾對路。

不過，問責官員唔出席民主黨的籌款晚會，唔代表雙方關係完全決裂，在工作層面上，大家仍然有關係，例如前面提到去年民主黨交的意見書，佢哋裡面有些意見，例如開發棕地和出售公屋，施政報告中都吸納了這些意見。所以唔可以話政府同民主黨，將來都冇咗工作關係，甚至唔可以話政府唔去爭取民主黨的六票，去通過政改方案，但工作還工作，呢類俾面派對，問責官員就唔去啦。

Ariel

** 博客文章文責自負,不代表本公司立場 **

中聯辦昨晚舉行新春酒會，事前傳出唔請泛民事件，後來Ariel 爆料，話唔係唔請泛民，只係唔請被預約拘捕的佔中泛民， 昨日現場所見，由於好多激進泛民如長毛都係被捕人士， 不在邀請之列，所以昨日新春酒會好平靜。

平時中聯辦酒會長毛老例到場，然後大叫口號示威離場， 佢其實都好識做，通常在儀式開始前就做完大龍鳯走埋， 唔會在中聯辦主任張曉明講嘢時大叫，但昨日佢無受邀， 連例行示威呢幕都無埋。有在場的建制派人士分析， 佔中後中央擺硬，根本唔歡迎激進泛民來示威。

中聯辦今年僅邀沒因佔領行動被捕的泛民議員，包括公民黨郭榮鏗、 郭家麒、湯家驊、民主黨單仲偕、民協馮檢基。 工黨只有張超雄及張國柱獲邀，而李卓人及何秀蘭未有獲邀， 工黨不滿，結果杯葛無到場。

昨有少少示威行動的是公民黨郭家麒，他撐着黃色雨傘到場， 在未進入酒會範圍前，舉起黃色雨傘，數名保安人員隨即向他表示，不能帶雨傘進場。 郭家麒之後收起雨傘向傳媒表示，由於不能帶雨傘入場，因此他離場抗議， 並將寫上「我要真普選」的抗議橫額交給一名中聯辦人員。

阿爺去年請全數立法會議員去酒會，以示政改問題可以溝通， 佔中後擺明唔請激進泛民， 中聯辦主任張曉明發言時亦傳達中央對佔中的強硬訊息，大力「 點讚」港府及警隊處理佔中的能力。