暴力示威持續，不斷有警員受傷，最嚴重的燒傷，包括被鏹水彈擲中，或者被汽油彈燒傷。燒傷者表面看受傷範圍好少，但最後要植皮換皮，創傷極大。
10.1警員被鏹水彈掟中，胸前一大片皮膚受傷。(警察加油專頁截圖)
10.1國慶日，兩名警員被鏹水彈掟中受傷。在社交媒體上，傳發了其中一個被擲中胸口警員的信件，講述他的治療進展，說到「一陣風吹過都會劇痛」，令人神傷。
受傷警員要植皮。
信件全文如下:
大家好，我係10月1日喺屯門大會堂外執勤期間被思疑腐蝕性液體所傷嘅衝鋒隊警員。今次發文，主要希望以呢篇文章，多謝各方嘅關心，另外亦希望直接同大家講一句：我接受緊好專業嘅治療，大家唔好擔心！我承受的痛是正常的，無咩需要擔心，大家看到啲像片亦唔好太驚，我哋嘅傷處正好理想咁康復！
自從情況穩定之後，警隊現職各個層面嘅人員，甚至已退休嘅夥伴，喺形勢無咁緊張嘅時間抽空探望，期間有激動憤慨，亦有熱淚盈眶，深受感動！另外福利部，職員關係科嘅同事，拳頭會嘅代表，喺我受傷期間， 不辭勞苦，為我處理好多好多問題，亦為我家人提供各種支援，萬分感激。
坦白講，當日如果無帶頸套，相信我所受嘅傷害不止於胸口，整條頸部，甚至氣管亦會受到非常嚴重嘅傷害，生死一綫，我唔知係唔係精神上出現類似創傷後遺症，會不自覺手震，流淚。。。心理服務課人員知悉後即時提供悉心輔導，幸而情況得到改善。多謝你哋呀！！
人員帶嚟除咗有部隊內嘅一份支持，亦帶嚟好多好多有心人嘅慰問，關心！我哋聽講我哋嘅傷情亦得到好多好多媒體的關注，我哋都無諗到自己會得到這麼大的關心和支持（收到好多慰問卡吖，又有手工製作嘅小禮物，好多好有心思，亦有好多窩心嘅字句吖！）
另外當中亦包括大家都擔心我哋有無接受到適當嘅治療嘅疑問！喺呢度我再一次同大家講：我接受緊好專業嘅治療，大家唔好擔心！
大家可能睇過另一位兄弟所寫嘅文章，當中提到『痛，好痛。。。』大家有疑問點解會咁痛？無止痛藥？被粗暴對待？其實都不是。大家曾經都有擦損手腳嘅經歷，清洗傷口嘅時候一定係痛！止痛藥係有，但係並唔可以百份百去除痛嘅感覺！我同另一位兄弟被思疑化學腐蝕性液品造成三級燒傷，傷口深，面積大，傷患處每日需要清理，擦除去壞死嘅組織！話俾你知唔痛肯定係呃你嘅，一陣風吹過都會劇痛，傷口本身皮膚上面嘅神經非常多，痛是非常正常的生理反應！曾經有一位資深教授講過『清洗傷口嘅時候，痛先係好，幫你完全清理好傷患，求其洗，你唔痛跟本唔係為你好！』所以，痛—係我哋感覺嘅一種表達，並唔係一種”控訴”， 不要以為我同另一位兄弟受到粗暴對待！！當時實在係痛到暈，只知嗌出嚟係緩解嘅一種方法，希望大家唔好對專業嘅醫護人員存有不必要嘅誤解！！
喺前綫執法，我哋都希望所有人相信我哋嘅專業；依家我瞓喺病房，我選擇絕對相信醫護人員嘅專業！大家可以對事件有唔同嘅立場，但係我唔相信專業嘅人會自己踐踏自己嘅專業！同時我相信，要好好康復，與醫護人員互相信任，先可以事半功倍！況且，我同另一位兄弟喺病房休養咗咁耐，並無任何受到令人難受嘅對待所以，大家唔需要擔心！我哋係警察！都係一往無前！呢份傷痛我同兄弟肯定可以慢慢慢慢熬過去！
受傷之後，我最怕最怕嘅係我嘅傷痛會影響到我嘅家人和同事，依家我喺度向大家報平安喇；我受傷期間最擔心嘅亦係我家人和同事！前綫嘅兄弟姊妹，我真係好擔心你哋，暫時我無辦法同你哋並肩作戰！懇請你哋做嘢小心，多啲休息。
我會盡快康復，重投前綫，再一次與大家並肩作戰！！當然更希望，當我康復嘅時間，香港已經回復太平！！！
We are Police！
We are Hong Kong Police！
讓我們一起為香港繼續努力！
香港警察加油！！//
Ariel
** 博客文章文責自負,不代表本公司立場 **
