政事
立法會財委會審議創新科技局撥款遇上拉布，政府為趕在2月14日 本財政年度前通過，要求財委會增加會期，昨日又惹起泛民開鬧。
泛民力攻財委會主席張宇人安排議程偏幫政府， 公民黨毛孟靜鬧到無嘢好鬧，竟然話：「 反而覺得吳亮星做主席仲有啲基本公道精神， 起碼一路忍咗好幾個星期……」
吓，贊吳亮星? 當日財委會處理新界東北前期撥款時，吳亮星被彈到一錢不值， 衰到無人有，如今毛姑姑竟然贊他? 連民建聯陳鑑林都頂唔順，話毛孟靜「掩住良心讚吳亮星」。 政界中人分析，呢個世界係咁，任何人在台上都係衰人， 一落咗台就變番好人，你睇對落台高官的評價就知， 話吳亮星好過張宇人，都算經典啦。
講番創科局的撥款，有高官私下評論，就話唔太樂觀可以在2月14 日死線前通過。因為近日政府高層和泛民的口水戰愈演愈烈， 關係愈搞愈差，泛民一定博老命阻你過。他恐怕撥款失敗， 又會成為另一政治話題。
Ariel
** 博客文章文責自負,不代表本公司立場 **
亞視經理人德勤應法庭要求，招標競投亞視大股東黃炳均的10. 75%股權。據蘋果日報報道，最少有四名白武士出手， 包括一度是中國首富的萬達集團大股東王健林、 遠東發展主席邱達昌、金至尊集團主席黃英豪，以及曾出手打救HM V的胡景邵。
知情人士話，四個可能買家中，較不起眼的是黃英豪和胡景邵， 但他們後台強橫，不可小覷。例如黃英豪， 當然不是他自己獨力出資競購，背後很可能有中資財團作為大後台。
至於胡景邵，應該是以匯友資本的名義入標，他是匯友的創始合伙人， 之前曾在2009至2011年期間曾擔任橙天嘉禾的行政總裁。 知情人士叫Ariel睇睇匯友的網頁， 睇吓匯友三個合伙人的介紹，發覺真係有啲料到。 匯友網頁只介紹三個合伙人，創始合伙人胡景邵、 創始合伙人鄭達祖、合伙人兼董事總經理何智恒。 胡景邵和鄭達祖都做過百富勤， 胡景邵曾做過法國巴黎百富勤和百富勤融資， 鄭達祖曾是首位長江巴黎百富勤董事總經理。
匯友網頁截圖
何智恒的介紹第一欄是他之前的工作「德祥企業集團副總裁」， 有趣的是德祥企業老細係陳國強，而家係無綫大老細， 個舊部走去買亞視，都幾趣喎。
亞視呢次賣盤，引咗班大孖沙出來，各有強硬後台， 可能都要鬥一鬥啦。
