政事
年近歲晚，好多人落區派揮春，自由黨田少派嘢之餘，不忘寸人抽抽水。
田少在自己facebook貼派嘢相，並加留言，話：「立法會日日嘈嘈閉，有議員情人節係都要加會同張宇人過，亦有議員連唔見五十萬都唔知，淨係識候住特首寶座，我就話落區同市民拜個早年好過！」
田北俊facebook
田少講「唔見五十萬」，自然指新民黨主席葉劉淑儀被網上騙財事件，葉劉咁精明都受騙，就要捱下俾田少抽水啦。
田少都算公平，講立法會加會，就係諷刺建制派在財委會加開會議，為通過創新及科技局護航。財委會主張宇人係佢黨友，人在江湖，都無選擇啦，田少寸人寸埋自己友，都算公平囉。
Ariel
** 博客文章文責自負,不代表本公司立場 **
民主黨廿周年黨慶籌款晚會本月廿七日舉行，特區政府發動全數高官缺席，運房局局長張炳良最後都係唔去參加，政府一出招，商界人士是否出席有啲猶豫。
民主黨籌款委員會主席李華明話，當晚開五十席，當中供各界人士認購的三十席早已全數賣咗枱，前政務司司長唐英年應承捐紅酒、前商務及經濟發展局前局長馬時亨雖然因離港缺席，但亦承諾捐錢。海洋公園前主席盛智文亦回覆會到場。這些捐助暫未因政府的動作有變。
民主黨早前將今年籌款目標訂為與前年一樣約300萬元，未因要籌錢搞公投而提高，但政府高官話不出席，又話不能助人捐錢搞公投倒自己米，確實惹起注意。
Ariel和商界人士傾過，佢話民主黨呢啲俾面派對，過去例必捐錢，並派公司公關大員甚至高層出席，希望維持良好關係，有事時對方都俾番兩分薄面，打自己時唔好去得咁盡。
佢話，如今政府玩杯葛，佢地都好頭痛，錢多數照捐，但諗緊去唔去，或搵邊個去，總之都係低調的好。佢慨嘆民主黨搞乜鬼公投，搞到咁僵。亦認為硬鬥硬後，民主黨同政府更加無偈傾啦。
