政事
預算案就快殺到來，傳出消息話今年度的盈餘，會由原先估計的200億變成600億，單係辣椒稅在樓中已經收咗200億，咁多盈餘可以預計到，預算案出來之後其中一個主題都係要求政府派錢。
依家傳出的消息，財爺都會出招，唔派又派，乜都派吓，例如向打工仔退稅，上限將高於去年1萬元；例如子女免稅額提升啦；又例如係公屋話唔免租，依家又免租一個月，差餉會減兩季。市民經歷過煲呔曾的年代，比較大力派水，甚至派6000元現金，其後停咗，到現在覺得財爺依家出呢啲招數，都只係少恩少惠，當然在現今的世代，派幾多都唔會夠，但政府作為一個俾人鬧少啲的動作，點都搵啲甜頭出來，都係合理行為。
立法會中人就話唔好睇今年的預算案唔會無風無浪咁，未來暗湧都幾大，雖然政府話吸納咗部份泛民建議，例如民主黨提議將公屋攞出來買等等，都有接納佢哋的意見，但係政府已經放晒風話會全線杯葛民主黨黨慶，恐怖民主黨都唔會同你客氣，在預算案問題上亦唔會俾面。今年的預算案除咗面對激進民主派的狙擊外，其他泛民都可能會出招，財爺都要預咗要挨啦。
Ariel
** 博客文章文責自負,不代表本公司立場 **
昨日，亞視管理人德勤公布咗有三個投資者入標想買亞視股份，但都不單是買法庭叫大股東出售的百分之10.75的股份，而是想買百分之40以上的股份，但係三個財團的出價，主要投資者王征都唔滿意，所以成件事又泡湯。
最好笑的係，管理人本來要求每個入標者要俾50萬入標費，結果三間入標者無人願意俾，連收150萬的如意算盤都打唔響，亞視在無錢出糧的前提下，又有新搞作。名媛趙曾學韞話佢曾經在六十年代曾在亞視新聞部做過三年打字員，對亞視好有感情，提出一個計劃，叫市民每人捐1萬元，人人捐錢救亞視，目標係籌到3千萬，買亞視百分之10.75的股份，大股東就會用呢筆錢來出糧。
一聽就知道呢啲建議唔可行，普通亞視睇電視啫，點會出錢買一間搖搖欲墜的公司的股份，有錢不如去炒吓國企股啦，要一人一萬元，籌到3千萬，即係要3千個市民去入股，認股情況咁踴躍，我估只有好強勁的新股先得。
另外，最大的問題係，按法例，超過50個投資者入股的投資計劃，係要俾證監會審批，依家佢哋咁樣募股，其實已經跌入投資計劃範疇，隨時犯埋法添。不過，亞視為咗籌錢出糧，騎呢招都層出不窮，呢個都唔算特別奇怪。
真正的問題係依家有人入股，大股東又吊高來買，自己有錢又唔肯出糧，呢個先係最大的問題，最後咁樣搞吓搞吓逼落去，其實只係逼政府收番佢個牌。
