港大退聯高手所為

港大學生會公民投票，結果200幾票之差退出學聯。學聯受到呢個重創後，下一波仲要面對嶺南大學學生會的公投，如果嶺大學生會都決定退聯，學聯八個學生會組織去其二，唔知有冇其他跟尾，成個學聯都散咗一半。

中大高級講師蔡子強就批評學聯現職領導無好積極做功夫拉票，導致到港大退聯成真。另外，媒體亦廣泛報道前學聯高層、現時民陣負責人陳倩瑩用粗口大罵退聯人士，結果俾「港大學生會退出學聯關注組」在投票最後階段貼上facebook。在在都顯示學聯無力回天，甚至激發咗港大退聯的情緒。

睇番港大退聯關注組專頁在FB上的貼文，都發覺佢哋進擊策略都有板有眼，搞出靚靚圖，顯示出學聯的理想同現實有幾大差距。又貼文引用魯迅的名句：「沒有激烈的主張，他們總連平和的改革也不肯行。」大力質疑學聯唔係「死到臨頭」，連提改革都唔想去提。

綜合成件事去睇，港大學生呢次退聯行動，都係高手所為，利用咗學聯依家領導層的弱點，在無鎂光燈照射下，在唔係威威水水的場合，要被動挨打，就無積極性做水磨功夫，結果就促成港大退聯成真。

成件事教訓大家，學聯在佔中係威係勢，因為那時係攻擊建制，但攻擊人容易，要防守就難，其實學聯本身都係一個建制，俾對手睇到呢個弱點，倒反轉頭，學聯要做維護建制的工作，結果就一敗塗地。

Ariel

** 博客文章文責自負,不代表本公司立場 **

重建後嘅皇崗口岸喺2026年10月12日正式開通，實施「一地兩檢」同「合作查驗、一次放行」，仲要24小時通關，真係好方便。開通接近一個月，平日日均出入境人次已經超過86,000，比以往落馬洲管制站多咗成倍；去到週末同假期，日均更加直逼140,000人次，受歡迎程度可見一斑。

不過，人潮多咗，交通需求大增，政府就留意到有市民同旅客貪方便，搭咗啲跨境私家車往返兩地，而且當中部分係非法出租或取酬載客嘅「白牌車」。呢啲車無合法嘅出租汽車許可證，做生意屬刑事罪行。為咗保障乘客同道路使用者安全，政府近期已經明確表示高度關注，執法部門亦加強咗打擊，除咗依法檢控違例司機，仲會扣押涉事車輛。運輸署同警方亦都密密做宣傳，除咗於官方網站及社交媒體發放訊息，運輸署亦向封閉道路通行許可證持有人以及指定跨境駕駛計劃批准信持有人發出電郵，直接提醒相關車主唔好以身試法，列明違法嘅嚴重後果，同時呼籲市民要認清風險。

警方近日在新皇崗口岸拘捕一名42歲持雙程證的內地男司機，涉案豪華七人車亦被拖走扣留檢驗。

可能有人會諗：「有人肯車我，價錢啱咪得囉，做乜要搞咁多嘢？」但高人提醒，從市民自己嘅角度出發，坐「白牌車」其實係一場「搵命搏」嘅賭博，主要有兩大風險：

第一，保險隨時有機會失效，意外隨時面對索償無門。

合法嘅跨境出租車必須持有常規配額、封閉道路通行許可證同出租汽車許可證。但「白牌車」冇呢啲牌，一旦發生交通意外，提供非法服務嘅車輛，佢嘅第三者責任保險係有可能會失效。即係話，如果坐白牌車出事受傷，甚至造成傷亡，你有機會追究無門，無法獲得應有嘅賠償。為咗貪一時方便，將自己同家人嘅安全較飛，值唔值得咩？

第二，罰則極重，唔好以為只係抄牌咁簡單。

根據《道路交通條例》第374章第52(3)條，無牌載客屬刑事罪行。警方會用「放蛇」方式去蒐證，亦會喺口岸一帶同黑點加強巡邏。一旦斷正，首次定罪最高罰款港幣10,000元、監禁6個月，車牌吊銷6個月；如果再犯，最高罰款25,000元、監禁12個月，車牌吊銷12個月。涉案車輛喺吊銷牌照期間要交畀運輸署保管，司機更會被停牌最少12個月至3年。運輸署仲會撤銷埋涉事車輛嘅封閉道路通行許可證。如果涉及內地司機，警方仲會查埋係咪非法勞工或者違反逗留條件，轉交內地執法部門跟進。

其實皇崗口岸嘅交通配套正逐步完善，港九新界都有合法交通工具直達，包括7條專營巴士（6條日間、1條通宵）、3條日間同3條通宵專線小巴、5條短途跨境巴士同長途跨境巴士，仲有市區的士、新界的士同車隧的士。

高人話，政府打擊「白牌車」，並唔係要阻礙大家出行，而係要守住安全底線，同時可令皇崗口岸更暢順。對市民來講，搭合法交通工具先可以保障自己同屋企人。