小鯊最喜歡睇嗌交打交， 估唔到樓市升跌都會令到物業投資者嗌大交。
資深物業投資者紀惠集團行政總裁湯文亮早前一篇「 細價樓三個月爆煲」文章，引發一場口水戰， 他發文後另一物業投資者林一鳴在facebook貼文反駁， 睇嚟激嬲了湯文亮，湯昨日在一個地產網貼文向林一鳴下戰書， 以六個月為期，話若8月14日中原城市領先指數高於上周五的13 6.64，湯文亮便認輸，會在富豪飯堂福臨門宴請傳媒， 並承認自己預測錯誤。然而林一鳴似乎唔想接戰，昨晚在facebook刪除當天反駁湯文亮貼文。
湯文亮當日一篇貼文「細價樓三個月爆煲」引發這個爭論， 佢話從朋友得知財仔過度借貸，借到四按， 可能引發的樓市爆破危機大大上升咁話。
後來林一鳴則以《我不信細價樓三個月內爆煲》為題在facebook撰文，從經濟學角度，價格變動主要看供求關係， 向財務公司借錢只佔市場小部份，要令細價樓在三個月內爆煲， 機會不高，主要看市場。林一鳴指普遍市民認為樓價是時候「應該」 下調，不過，從目前供求情況而言，「應該」和「現實」是兩件事， 普羅大眾認為樓市「應該」跌，情形如睇劇集，壞人「應該」 要死的下場一樣。樓價係咪真係跌，不是用「應該」和「不應該」 去理解。
小鯊雖然未必認同湯文亮的觀點，但好配服他那度氣， 本來你又講我又講無乜結果，他立下具體戰書，邊個唔信下場接戰， 半年後就有分曉。林一鳴刪文若然真係拒戰， 即使動機是不想和人鬥氣，又真係龜縮咗少少。
湯文亮昨日的貼文:
http://www.property.hk/ article_content.php?author= PHK_TML
小鯊
** 博客文章文責自負,不代表本公司立場 **
在電郵收到王維基的香港電視網上商場（HKTV Mall）的廣告，開戶送100元購物券， 又睇到港視開台兩個半月收視急挫70%的消息， 港視最新一周收視每日平均點播用戶跌至6萬，直播收視戶9.9萬 ，都為維基哥擔心。
小鯊同一個傳媒高人飲茶，佢話維基哥好似有一種肥佬黎病， 一單嘢未搞好，又大力掟水搞第二單嘢，高人舉蘋果速銷做例子， 話肥佬黎當日搞速銷， 第一個月問公司內負責睇數的周安橋蝕蘋果速銷蝕幾多， 周安橋答話唔計開業投資月蝕2000萬，肥佬黎話蝕得唔夠多， 要蝕多啲才可以打開局面，如是者問咗兩個月，虧蝕一路增加， 到第三個月，月蝕3000萬，肥佬黎問數問到呢個月就無問， 盤生意唔掂，肥佬黎就無興趣睇，半年後不聞不問， 又轉去諗第二啲生意。結果蘋果速銷蝕咗15億先至執笠。
高人話後來肥佬黎搞台灣電視都有呢個現象，開始慶恰恰， 但開台半年唔係幾順，攞極都攞唔到牌，肥佬黎又唔想理， 又轉去搞第二啲嘢。佢鐘意打順景波，唔係幾識打逆景波。
高人話而家睇維基哥有類似病狀，港視無電視牌照樣網上開台， 但節目力量未夠，客戶試兩試無料到就走，所以收視回落得咁快。 但港視未搞掂，又開HKTV Mall，若然一個客派100元購物券，100萬客就派咗1億， 但新客嚟攞著數試咗一次，又唔係咁平，貨品又唔係咁特別， 用完著數就無番頭。
維基的算盤係港視無乜廣告，都可以做番HKTV Mall宣傳，問題係港視係唔係一個強勁宣傳平台? 以佢每日6萬點播戶、9.9萬直播戶計，加埋累計都係16萬， 除開1小時真係1個收視點6.5萬人都未夠，少過亞視收視人數， HKTV Mall想做宣傳，每年掟1000萬去亞視做宣傳， 肯定成為亞視最大客戶，真係由朝播到晚都得，多人睇過港視， 但唔使花港視1、2億的年開支，自己搞個台做自己的宣傳， 條數計唔掂喎。
