議會報告唔靚仔 英政府未必強硬

英國國會下議院外交事務委員會發表《中英聯合聲明》簽署30周年報告，批評多多。

報告認為政權移交接近18年，香港保持繁榮穩定，但是「高度自治」不斷受壓，尤其是去年北京發表的《白皮書》、人大常委去年就2017年普選提出「不恰當」的限制、新聞自由受衝擊等，同時又提及中方不准委員會成員訪問香港。委員會又擔心，香港高度自治受威脅，要求英國外交部明確表達立場。

呢份報告出爐，相信阿爺同特區政府都預咗唔會靚仔得去邊，之前政務司司長陳方安生與民主黨創黨主席李柱銘到倫敦出席過委員會的聽證會作證，到去年年底，委員會部分議員打算來港了解情況，被拒絕發出簽證，北京外交部亦曾批有關調查干預中國內務事務。

搞出咁多風波，份報告又點會寫得好呢。不過，有政壇高人就睇到份報告附件中有好多證人的作證，其中有位係處理香港問題的老手，就係Alan Paul，佢喺1991年至回歸後1999年，擔任駐香港的中英聯合聯絡小組的副代表及代表，參加過36次聯絡小組的會議，後來仲做過英國駐港副總領事。

佢在書面作證中提出幾點睇法，包括指出在中英聯合聲明中並沒提及普選；近期有關香港民主發展的爭議，是執行基本法細節，是中國的事務，英國並沒有直接責任，決定香港民主發展的性質同發展；他又認為回歸以來，在「一國」同「兩制」取得正確平衡一直係主要關注點，他認為中國對香港基本方針沒有改變，雖有些可理解的擔憂，但無違反聯合聲明的情況發生。

英國外交部歷來都有中國通同對華強硬的不同意見，Alan Paul都屬於中國通呢類，唔會認為同中國鬥硬有用，睇番今年以來，為營造兩國關係，威廉王子在春節時用中文向中國觀眾拜年，訪華期間又帶上英女王的信件，邀請習大大年內訪英，相信兩國都會維持呢種氣氛，英國希望在中國經濟發展中分一杯羮的前提下，相信英國外交部未必會如委員會報告要求的咁強硬啦。

Ariel

** 博客文章文責自負,不代表本公司立場 **

去年國務院總理李克強的政府工作報告，只提及一國兩制，未有放「 港人治港、高度自治」八個字落去，惹起一點爭議， 今年的政府工作報告「港人治港、高度自治」重現， 又係唔係代表阿爺對香港政策好軟呢？

全國人大代表田北辰話，重現八字突顯今年是特殊的一年， 反映中央希望政改能夠通過，因為政改正針對港人治港、高度自治。

政壇中人話，阿爺擺到明話想政改通過，但加番「港人治港、 高度自治」落去，唔等如同想通過政改，兩件事無乜關係。其實「 港人治港、高度自治」《基本法》寫到明，唔會取消得到。 去年工作報告無講，見有反響，加番都好正常。

但又唔可以從加番這八個字去詮釋阿爺軟咗。若要咬文嚼字， 今次報告第一次以「嚴格依照憲法和基本法辦事」，代替過往「 全面準確落實基本法」。話到「嚴格」，都有從嚴的意思掛。

北京開會的會友對「嚴格依照憲法和基本法辦事」，有幾重解讀， 第一佔中係違法，以後呢啲犯法嘢唔好搞。 第二基本法講明特首普選先要經過提委會這一關， 搞政改唔好諗唔使經提名委員會，人大常委會8.31決定講出具體方式，亦唔好旨意有得改。第三而家香港興起的港獨思潮， 違反憲法和基本法，諗都唔好諗。總結一句是阿爺仍然企硬立場， 無變喎。