九巴母公司載通公布業績，去年純利4.2億元，按年升11. 8%。載通業績睇到旗下九巴條數， 九巴去年因為加車費和油價下跌，扭虧為盈，大賺1.97億。 九巴賺到咁，睇怕都無法加價啦啩。
九巴去年營業額63億元，按年升1.6%，做多咗大約2000萬生意，佢去年7月加車費3.9%，載客量又微升0.3%，佢生意收入多咗。成本亦顯著下降，油價於去年下半年大跌， 全年共減少1.73億燃油開支。九巴前年蝕2000萬，去年轉賺 1.97億，可見油價大跌燃油開支大減，是關鍵因素。
去年油價在7月上高位後回落，油價都要等到第4季才較低， 若然今年下半年油價未急促回升到去年7月那種100美元以上的水 平，假設上半年油價只是如現水平的40多美元， 下半年即使回升都是50多60美元的話，全年平均油價只有50多 美元，比去年只有第4季一季油價便宜，九巴燃油開支節省更大， 勢將大賺特賺。
九巴去年7月加價3.9%，是自2011年第三次加價， 累計加車費12.4%。有政界人士話， 雖然油價不直接反映在九巴車費可加可減的方程式內， 但過去九巴高層講過油價高企佢地生意難做，才要申請加價， 如今油價低企，佢地不單不應加價，似乎應該回饋吓市民噃。
Ariel
** 博客文章文責自負,不代表本公司立場 **
財爺鬍鬚曾昨日去商界午餐會，一般而言， 呢啲什餐會都係為預算案解吓話， 大家都唔預有乜石破天驚的勁料會爆， 所以財爺發言和答問時都經常搞Gag， 即使問到好嚴肅的銷售稅都唔例外。
話說有商界人士問佢，可以點樣擴闊稅基， 當大家以為鬍鬚曾將會硬銷「銷售稅」之際，佢答話， 稅呢家嘢永遠都係敏感事，無話有一個啱嘅時候討論。佢仲講「 可以開徵嘅稅，其實只有兩種，一種是帶來痛苦的稅， 另一種是帶來更多痛苦的稅」。搞到台下捧腹大笑，但細心一諗， 財爺好似無講如何擴闊稅基喎。
成件事源於財政預算案，在「保障收入」類目中，重提曾經在200 6年由當時財爺唐英年提出的銷售稅。預算案指香港稅基狹窄，只有 4成工作人口繳納薪俸稅，交稅最多的5％負擔60％稅款。 利得稅方面則只有10％的註冊公司繳交稅款，交稅最多的5％ 註冊公司繳付80％稅款。預算案「 可以在適當時間再次審視擴闊稅基的可行性， 務求有效穩定政府收入，增加直接稅寬減的空間。」
不過知情人士對Ariel話，銷售稅只是「講吓」，不會實行， 在如今600多億盈餘的時候去搞銷售稅，係「搵來鬧」的行為， 財爺鬍鬚曾唔會做。
咁唔會做預算案為乜重提銷售稅？皆因去年政府的長遠財政計劃小組提出的一連串問題， 提出香港稅基狹窄，長遠會出現結構性財政赤字， 所以政府內部正在研究，是否推出銷售稅，預算案就提出來講吓， 叫做有個交待啫。
