外傭偷拍格雷的五十道色戒斷到正

互聯網興起令實體盜版行業息微，所謂「實體盜版」，就係指揸部機走入戲院偷拍套戲，再製成翻版碟出售。喺2007至2008年，實體盜版仲係高峰，一年都有八、九套戲俾人咁樣喺戲院度翻拍，翻拍者賣出個母本，仲可以賺到18蚊美金。不過到咗近年，互聯網上咩戲都有得睇，呢啲實體盜版、賣翻版DVD的行業就差唔多銷聲匿跡。

不過香港電影製作發行協會仲有懸紅支持打擊喺戲院翻拍的行為，每名戲院人員舉報一件盜拍事件，就會得到2000蚊獎金。幾年前嗰套好紅的《3D玉蒲團》，結果就係戲院捉到24個盜拍者。不過香港電影製作發行協會就賠了夫人又折兵，因為每個舉報俾2000蚊獎金，結果俾了四萬八出去，但呢啲所謂「盜拍者」，好可能只係入戲院睇戲的人或者遊客，影一兩張俾自己欣賞，所以都無咩個案可以告。

最近上映的《格雷的五十道色戒》就搵到一個「真實」的盜拍者，事緣一名女性外傭入戲院睇呢套戲，舉手機影咗20分鐘，當然俾戲院員舉報，俾海關拉咗斷到正。由於影咗20分鐘係好實質盜拍行為，唔係影一、兩張相咁簡單，雖然外傭聲稱翻拍係供自己欣賞，並非作商業用途，但成單嘢就交咗去律政署，有可能俾起訴。

話說回頭，就算好似呢宗個案，估計個外傭都唔係諗住翻拍攞去賣，所以呢個實體盜版行業都係差不多消失咗啦。

Ariel

** 博客文章文責自負,不代表本公司立場 **

港澳辦副主任徐澤年屆60歲，行將退休，58歲的中聯辦副主任王志民將調住港澳辦，接替徐澤出任副主任職位。

內地正部級官員65歲退休，副部級官員60歲退休，國務院港澳辦是正部級機構，主任是正部級，副主任是副部級，去年底已屆60歲的徐澤已到退休之年。而王志民在中聯辦一直負責青年工作。知情人士仲話，王志民去到港澳辦亦會好似徐澤一樣，係港澳辦的第一副主任，角色相當吃重。

了解情況的高人仲話，從今次的調動，可以見到在港澳事務上，阿爺在人事安排有新思維，在中聯辦長期工作的王志民，北上到港澳辦出任第一副主任，唔似以往官員擔任中聯辦副主任一段時間後，多數都係調回原來工作地，調往港澳辦則非常罕有。

高人相信，顯示阿爺有意加強負責港澳事務的中央部委之間的情況交流，一啲長期熟悉港澳事務的官員，繼續在相關部門發揮作用。

至於港澳辦主任王光亞亦已到65歲退休年齡，他在和港澳人士私人聚會時也會提到適當時會退休。問題是香港問題未來大仗連場，遠的不說，今年7月先打立法會審議政改方案的硬仗，到11月又有區議會選舉，為未來兩年的立法會選舉和特首選舉拉開戰幔，故傳聞王光亞不會按退休年齡離職。

在今次官員調動中，可見阿爺係用人方面有新方向，睇嚟都預咗港澳事務會有連場硬仗，需要熟悉情況的官員打仗。