政事
有傳聞指政府明天會對亞視續牌作決定，商務及經濟發展局局長蘇錦樑在立法會財務委員會召開特別會議時表示，有留意有關傳聞，但要尊重行會保密制，拒絕評論有關報道。
Ariel最近遇上一個建制派大佬，佢對阿爺的取態都有相當了解。我問佢點睇亞視續牌，佢搖頭嘆氣，話亞視老闆王征搞到咁爛，如果政府決定續牌俾亞視， 點樣同市民交代？政府唔係喜歡做乜就做乜，要做得合理先至得。
佢話政府俾咗好多機會亞視，佢地搞到如今咁，唔好怪夥記，主要係老闆造成，到底老闆個心係唔係放在香港，全力做好亞視？
近日亞視大老闆王征先接受財新網訪問，話亞視三月底前就「 氣數已盡」。跟手又接受騰訊財經訪問話無講過。政圈中人話，王征玩到人眼都花，似乎在向阿爺施壓，要阿爺幫佢搵個出到價的賣家。問題是愈搞亞視愈爛，間公司仲邊有價值呢？
Ariel
** 博客文章文責自負,不代表本公司立場 **
香港大學處理法律系副教授戴耀廷接受捐款的事件，鬧到滿城風雨， 聞說上周港大校務委員會將調查戴耀廷事件的審核報告打回頭時， 仲發生一段港大校長馬斐森認錯的事件。
有知情人士爆咗條堅料俾Ariel， 話上星期港大校委會審議法律系副教授戴耀廷接受捐款的審核報告， 會後向外公布份審校報告無端端變成「中期報告」，仲要再交「 最後報告」。
其實在校委會上，李國章「新嚟新豬肉」，無乜點出聲， 但幾個女校務委員已經開口， 話既然審核報告講到戴耀廷處理其中一筆捐款有違捐款者原意(將原本用作聘請研究助理的錢用來請了佔中運動的秘書)，為何無搞清楚戴耀廷及其他相關人等的責任，以及有無處分？最後校委會等如把報告打回頭，要負責此事的審核委員會再交一份「 最後報告」。
知情人士話，其實審核委會員早前提交了戴耀廷事件審核報告之後， 港大校長馬斐森已作了一個正式回應，接受了報告， 並無提出任何跟進行動。換言之若然沒有校務委員會委員提出意見， 整件事已經不了了之，但如今經校委員會討論後， 卻變成不接納有關審核報告。
知情人士話，港大校長馬斐森在校務會上，承認當日他如此簡單回應戴耀廷事件審核報告，犯上錯誤， 他就此致歉。
睇嚟港大調查戴耀廷事件，都不可以簡簡單單就走過場，每件事都要講到清清楚楚，先可以過到關啦。
