政事
行會決定亞視釘牌，但呢個唔係必然結局，主要係亞視大股東王征唔爭氣。
亞視現時擁有兩個牌，一個係今年11月到期的免費電視廣播牌照，另外一個用作傳送的固定傳送者牌照，到2018年11月先到期，當年唔知點解發兩個牌到期日不一樣。
原來政府去年有諗過一個中間方案，續牌俾亞視，但唔係續12年，而係續3年，將廣播牌續3年到2018年，同傳送者牌照到期日一樣，俾個機會，睇吓3年時間，亞視有換老闆後冇辦法搞番好少少。
如果王征在過去半年時間，搵到買家，提出一個似樣少少變身方案，其實唔難續到牌，雖然多數唔係12年咁長，但至少可以玩多3年。
但係過去一段時間，聞說唔少中間人拉線搵過幾個有實力的投資者傾入股，但王征開價實在過高，而且仲試過講好價錢後，突然又話呢度要俾多1千萬，那筆500萬數你幫我找埋，總之又係變相加價，終於3月31日死期到時，無一個收購協議落實得到。
Ariel
** 博客文章文責自負,不代表本公司立場 **
行政會議特別會議傾亞視生死，由下午1點開到4點半，足足3個半 鐘，淨係傾一個議題搞咁耐， 係因為需要全面審視通訊局之前每一個步驟都合法合規定， 即係特首所講「合乎程序公義」， 包括埋如何處理亞視新提交的條款協議書等。
另一個討論的焦點，係善後工作，包括消息公布後亞視萬一停播， 點樣應付，如果亞視馬上唔玩，電視台700多名員工的出路安排等等一連串預案，勞工及福利局局長張建宗都有出席今日會議。各樣變數都好多，政府成立跨部門工作小組，減低相關負面影響。
除了政府，相關各方其實都有做咗預案。 亞視目前與無綫共享全港多個山頭發射站轉播訊號， 無綫內部亦有安排，確保萬一亞視唔玩，唔會影響無綫的轉播能力， Ariel昨日已提過，亞視在欠薪期間周圍撲水，已向無綫出售山頭發射儀器，而且過去一段時間， 亞視的發射站成日欠交電費，似乎都冇乜心機打理。
馬迷最關心的係賽馬及市民關心的六合彩直播， 據知馬會亦有同相關電視台有共識。 發言人話依家同亞視的轉播協議，有效期直至2015年7月31日 ，期望亞視會繼續執行協議下的轉播安排。因應政府今日的宣佈， 馬會將會為下一個賽馬年度的賽馬節目和六合彩攪珠的轉播事宜作出新的安排，以確保有關直播不受影響。
