唐唐有新搞作

前政務司司長唐英年，做咗政協常委兩年，都係到會期去吓北京，唔見有特別嘢搞，嚟緊佢「出山」啦。原來佢籌組緊香港江蘇社團總會，下月底正式成立，他會做籌委會的召集人，佢話因為目前本港有不少江蘇籍人士都係中小企業，希望有個平台，幫助他們。

唐唐話曾拜會過內地多個部門，佢哋都支持，總會成立儀式仲會邀請行政長官梁振英出席，成立之後會舉辦服務業以及青年論壇，又會帶團去當地考察，覺得在服務業方面，香港有優勢一齊合作。佢話籌委會未有討論未來是否會參與政治動員，強調個會都係以經濟為主調。

唔講都無留意，江蘇已經係內地一個經濟大省，去年GDP僅次於廣東，有成6.51萬億元人民幣，廣東省就有6.78萬億元人民幣，差距很少，香港則是1.69萬億元人民幣。以人均收入計，全國平均是28,844元人民幣，江蘇排第4（34,346元人民幣）。

Ariel

** 博客文章文責自負,不代表本公司立場 **

行會決定亞視釘牌，但呢個唔係必然結局，主要係亞視大股東王征唔爭氣。

亞視現時擁有兩個牌，一個係今年11月到期的免費電視廣播牌照，另外一個用作傳送的固定傳送者牌照，到2018年11月先到期，當年唔知點解發兩個牌到期日不一樣。

原來政府去年有諗過一個中間方案，續牌俾亞視，但唔係續12年，而係續3年，將廣播牌續3年到2018年，同傳送者牌照到期日一樣，俾個機會，睇吓3年時間，亞視有換老闆後冇辦法搞番好少少。

如果王征在過去半年時間，搵到買家，提出一個似樣少少變身方案，其實唔難續到牌，雖然多數唔係12年咁長，但至少可以玩多3年。

但係過去一段時間，聞說唔少中間人拉線搵過幾個有實力的投資者傾入股，但王征開價實在過高，而且仲試過講好價錢後，突然又話呢度要俾多1千萬，那筆500萬數你幫我找埋，總之又係變相加價，終於3月31日死期到時，無一個收購協議落實得到。