料「一周一行」唔會令自由行人流大減

內地同香港終於敲定咗限制自由行的政策，由一簽無限行改為「一周一行」，知情人士解畫，「一周一行」同之前流傳過「一年52行」有分別，因為如果「一年52行」而唔係限制咗每星期只係來一次的話，旅客攞咗簽證就可以連續來52日，都壓止唔到濫用的情況。依家仍然係一年批出一張簽證可以52行，但當中規定一星期只可以來一次，如果你一星期來多一次就唔俾入境。

各方都估計搞咗新措施後未必對內地來港的人流會有好大影響，因為以走水貨來講，依家都係由六、七成係香港人，呢啲走水貨的情況會繼續，固然內地人來港走水貨情況會收歛一些。

雖然外界一直傳聞深圳好反對呢個改動，但聞說深圳政府唔係好反對，因為其實咁多人頻密過關，對深圳關口的人手都有一定壓力，佢哋亦都唔係咁想經常咁多人進出關口。

真正反對的係經常來港經商的人士，例如有不少深圳公司以香港為其中一個基地，就會覺得改咗簽證辦法對佢哋好唔方便，官方解釋就係以前啲商務人士都係貪方便，攞一簽多行方式來香港，其實佢哋係可以申請商務簽證，仍然係可以多次來港的，不過佢哋只係怕麻煩，以後用番商務簽證，對佢哋影響都係好細。

呢次改動估計心理影響大過實質，無論特區政府定中央政府都想先觀察吓，改一改後情況會係點，亦唔想來港人流變化太大，對香港衝擊太大。

Ariel

** 博客文章文責自負,不代表本公司立場 **

港台節目《城市論壇》35周年，前廣播處長張敏儀接受《蘋果日報》訪問時話35年前，她時任港台電視部，眼見香港經濟起飛，社會漸趨成熟，建議定期在維園舉行《城市論壇》，讓市民發表意見。

張敏儀提到，當時的警務處處長極力反對，「話涉及非法集會，一定會暴動」。

有港台前高層話，張大姐講咗其一無講其二。城市論壇在1980年開壇，觸發因是港督麥理浩在1979年3月訪華，見咗鄧小平，去探中國對1997年俾英國繼續管治香港的可能。點知鄧公直接講，話中國會在1997年收回香港。

麥理浩聽到面都青埋，話咁樣投資者會好驚，老鄧拋咗一句，叫麥理浩向香港工商界傳話：「請香港投資者放心」。麥理浩回港，傳咗「請投資者放心，」呢句話，但就呑咗中國會收回香港主權呢個重點落肚，跟手密密做嘢。

香港在80年馬上搞選舉，先搞地方行政，選區議員。同時就搞新聞自由，港台就開始搞城市論壇囉。

港台老鬼話，當時督爺想香港學英國有個海德公園，講乜都得。港台就抄呢個模式，將維園變海德公園，搞出城市論壇。

結論係英國管治香港百幾年，都無俾香港言論自由，港台在1979年前只是政府喉舌，寫完稿要俾官員審稿。但一知道香港將來要交番俾中國，就馬上放言論自由俾香港，英國人政治手段真係高架。