政事
亞視被釘牌，先後傳出匯友、港視、徐小明都想搵亞視搞合作，唔通真係瘦田沒人耕，耕開有人爭？
公開的資料睇，在亞視幾出幾入的資深電視人徐小明最豪，話已集到2億，願意營運亞視剩低一年的牌照，仲搵到200幾小時劇集播放，俾維基哥出手的4000萬，數目上大好多。聞說徐小明搵咗個內地商人泵水，仲係來自青島的商人，可能覺得攞得2、3億出來玩，仲可以博吓做開有條路，政府將來牌佢哋繼續做。
有電視業人士就笑笑口咁提醒徐大俠同背後投資者，要諗清楚經營一間免費電視台唔容易架，更何況係沉咗大半的亞視。先講片源，唔好以為260小時好多，每日播兩個鐘，眨吓眼四個月玩晒，亞視的片庫亦唔見有好多好嘢喎，早前無記已買走700套黑白粵語長片同幾千小時的劇集(主要係當年受歡迎的武俠片)，有口痕友形容，有價值的片都俾無綫買咗，剩番落嚟係咩，大家心中有數，要重播舊節目都要數吓播咩喎。
而且經營一間電視台，大大小小工種好多，依家亞視大約有員工600人，未計釘牌後速逃的員工，要跟足廣播條例運作落去都有難度。
投資亞視都真係一個大挑戰呀！
Ariel
** 博客文章文責自負,不代表本公司立場 **
王維基出500萬一個月包底用亞視每日4小時，一如Ariel早 前所講，此建議對亞視極其雞肋，因為佢地每個月要蝕1500萬， 收王維基500萬捱落去唔知為乜。亞視的反應一如所料地負面， 亞視執行董事葉家寶在網誌話港視提出500萬元保底金額偏低， 又質疑港視網上啟播後點擊數字有下降趨勢，亞視轉播其節目， 收視是否吸引到足夠廣告客戶投放廣告以平衡租用費。
電視業內人士戲稱，上次王征自爆願意接受王維基收購， 搞到王維基一身蟻。今次王維基自爆願意低價租用亞視時間， 有少少報復意味。但維基哥自爆就炒起咗港視股價，爆吓真係無妨， 但成事機會睇嚟唔高。
而家好多人話願意入股亞視，王征又陷入一個同好多人傾的階段。 曾在亞視工作15年的資深電視人徐小明，聲稱已組成財團，集到2 億元，營運亞視餘下一年的牌照，另外又取得260小時劇集播放， 話希望借亞視展示實力，爭取政府未來發牌給他們。
徐小明更爆料話上周同王征傾過，又話相信王征開價從來未低過， 雙方在價錢方面的確未達成共識，正努力達成合作咁話。
亞視呢個剩餘牌照的牌局，愈打愈人多，問題是以王征的談判慣性， 恐怕都唔會咁爽快有協議喎。
