政事
政改方案明天公布，各方都盡力拉吓泛民同阿爺埋枱傾。新界社團聯會昨日訪京，與港澳辦主任王光亞會面，會後引述王光亞指，中央會堅定不移支持政改工作，有決心、有信心落實普選，同時「堅守底線，不會作無原則的讓步」。
有新界社團聯會成員分析，將阿爺的話倒過來解讀，不作無原則的讓步，即係可作有原則的讓步，阿爺心中的關鍵原則是人大8.31決定，言下之意是只有符合8.31決定的讓步，阿爺仲有商量，唔係寸步不讓。
民建聯新任主席李慧琼以新界社團聯會顧問身份隨團訪問，她有向北京提出，希望可以見全體70名立法會議員談政改，換言之也包括希望北京見泛民議員。
講開慧琼姐，她隨訪京團昨日下午見國家副主席李源潮接見，李源潮和她握手有20秒，祝賀她當選民建聯新主席。北京對香港建制派的動向都好關心呀。
Ariel
** 博客文章文責自負,不代表本公司立場 **
林建岳岳少手下猛人多，其中一個是美女張寶華， 佢近期又有新搞作，寶娃見去年佔中佔到記者好辛苦， 覺得新聞自由好重要，就同牛津大學講，由佢每年資助10幾萬學費 ，設一個獎學金，每年俾一個現職記者，去牛津的路透新聞研習學院 (Reuters Institute for the study of Journalism)進修，寶娃唔用自己個名為獎學金命名， 以「獅子山精神獎學金」為名。
寶娃當年都攞過獎學金去牛津進修，如今名成利就之後， 捐錢出來照顧後來者，高風亮節，但以一個個人每年要資助10幾萬 學費，都唔係少數目，可見其慨慷程度也。 寶娃現職岳少旗下寰亞傳媒集團高級副總裁，據講5月尾會離職， 唔知係唔係自己出來搞生意，大展拳腳。
講開寶娃，佢在2013年曾將「張寶華」個名改為「張洺華」， 當時佢話「我個姓名學朋友話『寶華』個名好硬，就改咗佢」。 但唔覺唔覺去年佢原來又改番叫張寶華，佢自己的講法是「 改咗之後都冇人嗌，所以我都係改番『張寶華』。」 改名通常都係啲風水嘢，但人人識佢都係叫張寶華， 改咗新名唔記得，都係叫番張寶華順耳好多。
寶娃離開岳少，都係一個損失， 但岳少從來都係大量咁網羅傳媒界各方高人入局，手下猛將如雲， 最新一單係前信報總編輯陳景祥，傳聞陳景祥同岳少行得好埋， 好似會為岳少做嘢。人稱「警長」的陳景祥是資深傳媒人， 枝筆好厲害，又好熟政治，若然為岳少打工， 即使只以顧問身份效勞，都似係開呢兩瓣，一係只俾吓政治意見， 一係幫手開筆寫嘢。岳少盡收天下兵器，似乎從政的心都好濃喎。
