政事
繼香港大學及理工大學後，浸會大學昨日亦公投通過退出學聯。浸大學生會宣布，以934票贊成對613票反對，通過學生會退出學聯。
暫時公投咗四間大學，有三間退聯，只有嶺大表決留低，另外四間大學，樹仁未有退聯公投，而城大、中大、浸大將先後投票，若然再有一兩間走埋，學聯可以玩完。
前秘書長陶君行形容今次退聯是「共產黨秋後算賬成功」，指現屆學聯成員「過份老定」，在阻止嶺大退聯後無再動員，就出問題。
政界中人話，退聯潮是佔中後遺症，咁搞下去，若中大走埋，大間的大學走晒，學聯被掏空，敗象已呈。
Ariel
** 博客文章文責自負,不代表本公司立場 **
近排名人當衰，又一個政界名人要坐監，前商交所主席張震遠因為欠薪34萬，被判監6個禮拜，暫准保釋等候上訴，呢啲身嬌肉貴的政商名人若最後要入去監房坐監，真係好慘。
事後睇返成件事搞到咁「喎」，關鍵係張震遠反應太遲。案件涉及商交所的員工追討的欠薪只係34萬，數目不太大。過去因欠薪而坐監的個案雖然有，但唔係好多，主要是一啲酒樓搞手成日執笠轉名，有意唔俾欠薪，最後俾法庭捉出嚟先會坐監。
判張震遠坐監的女裁判官：香淑嫻
張震遠呢個case最後判到坐監咁重，最主要係主審法官覺得張震遠有錢交淺水灣豪宅租金（34萬欠薪只等如2個月租金），但就話無錢出糧，亦唔信淺水灣的租金係由佢太太俾，質疑佢係蓄意欠薪，先判佢坐監。
主審法官上次在庭上已不停問張震遠點解有錢交租，無錢出糧，結果激親法官，押後到今天判刑。
但事後睇呢個災難的起因係張震遠搞商交所生意失敗，又唔肯認輸所致。當日商交所被監管機構「釘牌」後，已經完全無前景，但張震遠無馬上將公司執笠遣散員工，反而拖咗落嚟。嗰時公司已經無得救，最後拖到尾自然出唔到糧。但正因為咁，就拖出好多欠薪，與此同時，張震遠繼續租住淺水灣豪宅，令法庭覺得不合理。佢最後申請破產又搬出淺水灣豪宅，亦行動得太遲。
公司執得太遲，個人破產得太遲，搬出豪宅太遲，可能都只係唔願意接受商交所失敗呢個結果，但就換來牢獄之災就十分慘情。
雖然法官判刑後同意張震遠保釋，等候上訴，不用馬上坐監。但上訴唔一定減刑，亦有可能加刑，佢的處境真係令人滴汗啦。
