一直都話三個JT老友鬼鬼想一齊搞吓嘢，昨日(4月15日) 3人終於一齊現身。自由黨榮譽主席田北俊（James Tien），前立法會主席曾鈺成（Jasper Tsang），前財政司長長曾俊華（John Tsang），三個人英文名字簡稱都係JT，3 JT昨日現身中環派口罩，大家見到，忽然有「選舉近了」的感覺。
3個JT 派口罩。
田少晚上在facebook以《三個JT夠晒數》為題發帖講起派口罩事件：「知啦，唔可以多過四個人派口罩嘛。多謝兩個老友曾俊華同曾鈺成幫手…今日喺中環派咗四萬個口罩」。田少帖文#香港最缺唔係口罩 #香港最需要係希望。
田少發帖。
講起選舉第一件事諗起田少搞緊個立法會選舉平台，話支持人9月去選立法會。
田少早前對媒體話，有幾個人接觸他，希望他支持出戰立會，包括本地文化深度遊組織創辦人陳智遠考慮出戰旅遊界，中科興業董事總經理潘焯鴻想出戰九西直選，新民黨前政策總裁袁彌昌想選港島直選。
昨日他們在港島派口罩不見袁彌昌現身。袁彌昌和舊老闆新民黨主席葉劉淑儀唔太啱咀型，袁彌昌太太容海恩又不獲葉劉支持再選新界東，若袁彌昌出戰港島區，和葉劉打對台的味道都幾強。
見到3 JT第二件事諗到是特首選舉，特別係曾俊華在2017年選過特首。3 JT派的口罩包裝袋上印有「給香港一個希望 HOPE FOR HONG KONG」的字樣，令人覺得有絃外之音，話而家香港無乜希望。
無獨有偶，另一個特首人選、前金管局總裁陳德霖又現身接受媒體訪問，德霖哥建議研究設立亞洲區域數碼貨幣，促進區內貿易。他認為早前香港決定封關是沉重的決定，因為影響生意、生計和民生，但何時再開放同樣困難，開放後會否引發下一波爆發同樣要關注，但必需要預早部署並告訴社會，重開市場和社會的指標是甚麼，「要讓社會有希望，有希望才可撐下去」。
佢又係話要讓香港社會有希望喎。
Ariel
** 博客文章文責自負,不代表本公司立場 **
選舉期日近，反對派繼續搞分區協調。繼九龍東、九龍西協調未成後，戴耀廷戴教主再度發威，組織各路豪傑，在昨晚（4月14日）召開新界東武林大會。
今日已有媒體報道泛民新界東立法會初選武林大會搞協調的情況，但Ariel 收一收風，有關報導有少少報喜不報憂。有昨晚參與會議的線人爆料話：昨晚7點到9點，戴耀廷、區諾軒召集反對派各政黨和一眾素人共計3、40人，在旺角教協總部開會，商議新界東初選事宜。
線人話一進門就心裡一驚，陳淑莊因為酒吧夜蒲正被人捉到正，現在教協內聚集這麼多人會不會觸犯「限聚令」？但他作為素人一名，心諗私人地方應該無犯法啩，而且萬一俾人映到也有大食大，看到戴教主和各大黨大佬都坐定定，也不敢多問。
反對派新東武林大會當晚達成兩個共識：一是討論通過了「6+1」名單，反對派上屆在新東9席中攞了6席，今次要坐6望7，那個1作為機動名單，到時根據投票情況，隨時做好「棄卒保帥」的準備。二是大家一致通過一個「共同綱領」，如果立法會選舉達到「35+」（得35席以上）奪權成功，就要堅持「五大訴求」、否決財政預算、彈劾特首。
線人仲話：關於「共同綱領」佢絕對係支持，無論是要搞死議會，還是搞死林鄭，最後香港攬炒，都好正路。但這個6+1名單會上沒有講，是泛民高層小範圍討論的結果。他聽到那個「6+1」名單，就好頂唔順。排頭6位的中獎名單包括公民黨楊岳橋，民主黨林卓廷，人民力量陳志全，工黨郭永健，社民連梁國雄，新同盟范國威。至於第7位是區政聯盟柯耀林/區鎮樺。
線人話名單全部給大黨瓜分，佢地啲年輕素人在前線玩命打拼，最後革命的果實就還是被這些「成功人士」搶走晒。
戴耀廷。資料圖片
線人話戴教主依家儼然是泛民共主，坐咗監之後更是「鍍咗金」，地位無人撼動。現在佢風風光光封咗神，咁我哋搏命係為左乜，得咗乜？就係曚查查參加個會議，俾人用來「抬轎」了。
他說更過分嘅係，不光大黨大佬們欺負素人，就連素人本身也分出階層和等級。聽說這次反修例運動大出風頭嘅岑子傑都「聞風而動」要來新界東霸位，同樣係素人，人家就係「知名」素人，就夠膽不服從大佬安排協調，會靠自己嘅人氣去參選，就有信心當選，名利雙收。人比人氣死人，我哋不知名素人就只能靠邊站啦。
線人接住話：今日到有媒體報道昨晚會議，講的會議好似內地人大會議咁「團結的大會，勝利的大會」，話素人更加支持限制名單，呢點真係講大話。當晚會議，民主黨擺高姿態，當場表態話「任何方案都支持」，佢哋當然支持啦！民主黨、公民黨等大黨的利益當然是重點保護對象，無人敢動，但小黨小派呢？素人呢？事實是，除咗鄒家成，好多素人對初選安排都不忿，只不過大家「敢怒不敢言」，怕得罪咗大佬，以後無運行。都知道黎智英要搞「道德審查委員會」，要大家以大局為重，邊個不服，就搞死邊個。所以佢要冒險爆料，為年輕人講句公道話。
聽到線人爆料，Ariel感慨萬千。首先，這次反對派搞出新界東初選，是採取「網上+網下」模式，先要市民去反對派掌控的區議員辦公室，用身份證登記後拿到一個身份確認編碼，再用確認碼到網上進行投票，根據投票排名結果，排行成「有約束力」的初選結果。表面睇好似公平，問題是區議員多數是政黨中人，透過他們辦事處去登記公平嗎？另外利用區議會辦公室和工作人員從事非官方選舉活動，會招「公器私用」之譏，相關費用據說是通過眾籌，又可能被質疑算入「選舉經費」，為什麼堅持這樣做？
戴耀廷搞出「雷動計劃2.0」人盡皆知，看來現在是要把新界東作為樣板，將來推廣出去。這就是泛民的政治，平日口口聲聲「為了香港」，最終還是大黨欺負小黨，大佬欺負細佬，名人欺負素人。
有政界人士曾向Ariel 透露，前反對派共主肥佬黎本來睇不上戴耀廷，認為佢只是書生意氣，好多反對派中人也對佢不滿。但現在戴耀廷通過「違法達義」搏得大名，仲通過坐監納了「投名狀」，現在好似古惑仔坐監出來，要坐正大佬開始話事。就連肥佬黎都認可了戴耀廷的地位，仲搞出個「道德審查委員會「為佢保駕護航」，遇人殺人，遇佛殺佛，對佢不滿的人也都不敢再出聲。今次是戴教主封神有路，無名素人參選夢碎，唔公平呀！
