Ariel同建制派高人食飯,席間講起政改方案過唔過,以及誰人出來選特首的問題。我問除了坊間日日數的特首人選外,近排有無傳乜嘢人會出來選特首。高人二話不說,講出「吳光正」三個字。
Ariel追問佢睇到乜嘢線索,高人諱莫如深,但反問吳光正咁心急交晒棒俾個孻仔吳宗權為乜?
68歲的吳光正又真係一早做好交捧安排,搞好晒今個月卸任,同時會退出九倉及會德豐董事會,日後只出任顧問,全面交棒予其37歲的孻子吳宗權,由佢全面接掌市值近3000億元家族王國。雖然吳光正68歲都唔算年青,但以超級富豪計,呢個年紀全退又真係少見。
席間有人問起到2017年選特首時吳光正已70,做特首會否年紀略大?高人話,仲有兩年,到時個局係點都無知,特別係過唔到政改方案,都唔一定風調雨順。咁又係,吳光正有心有力,磨利把刀,到時及鋒而試,都唔係無可能。
另外講吳光正時,有人話田北俊的說話都意有所指。田大少接受電台節目訪問時話,自己曾發表希望下任特首是「anyone but CY」、即任何人都可以做特首,惟獨梁振英不可以的說法時稱,有關說法可以說是真的,他更形容自己與泛民主派人士的想法一樣,覺得梁振英管治得一般,並不適合連任。
田少和吳光正好老友,咁講又有無為吳光正助拳之意呢?
Ariel
** 博客文章文責自負,不代表本公司立場 **