搵老船長撐政改有背後意思

早前Ariel發現撐普選的一方在網上發放一位老船長撐政改的片段，除咗在Facebook發功，亦上載咗上YouTube，發放呢段片的帳戶係「獅子山下」，同一個帳戶在微信上比較活躍。

原來支持政改一方搵呢位老船長拍咗呢條撐政改的片，有幾層意思。

片中主角係69歲的潘勝，家境清貧，由初級船員做起，經過自己努力做到可以駕駛幾萬噸貨船的船長，典型的獅子山下的奮鬥故事，代表香港今日的繁勞，係佢哋呢代人有份打拼。

片中潘勝自述，2003年患上肝癌，有機會去天津換肝，當時好多朋友話內地醫療水準信唔過，最後佢自己覺得機會唔把握唯有等死，決定去天津，結果醫番好。政壇高人睇過條片，搵有呢段故事背景的船長拍片應該係有暗示，就似講依家有種唔信中央的心態，而船長選擇咗信任去內地醫病，最後係得到想要的嘢。

至於搵咁大年紀的人呼籲議員支持政改，高人相信亦都想表達佢哋希望有生之年見到普選的訊息。

一個老船長的片段希望帶出咁多層意思，睇嚟支持政改一方都幾花心思，去軟推政改。

Ariel

** 博客文章文責自負,不代表本公司立場 **

各方關注政改方案何時在立法會表決，方案將會在下17日(下周三)提上立法會，知情人士話，很大機會速戰速決，在第二日即18日就表決。

能否快速投票，其中一個關鍵是激進泛民會否玩嘢。照目前的形勢，不太覺得方案有很大機會通過，激進泛民就不會拉布，因為無需要用拉布阻礙方案通過。若然只是為拖而拖，拖3、5、7日，都係玩到自己而矣。

如果激進泛民唔玩，一人發言最多15分鐘，講兩日大體上都可以講完。再加上若果政府唔覺得拖吓可以拉多啲票，增加方案通過的機會，要死不如死快啲，早早了結件事仲好。

基於種種考慮，6.18都係好日子，趕埋在當日收工前表決，唔使拖多一日。暫時唔見到有那一方，想推遲通過的日子。