政事
政改方案在立法會審議了大半日，一如所料，會上各有各講。林鄭繼續推銷、建制派力撐通過、泛民慷慨陳詞堅持否決，內容唔聽都估到佢哋講乜。
大家最關心都係幾時表決，之前有傳泛民想拖到周四晚稍夜時段，等埋支持者放工來立法會外聲援才表決，不過，有高人話估計泛民未必會拖落去。
至於政府又想幾時表決？原來上上策係明天(周四)下午五點，唔係估架，今日下午開會期間，有出席的官員將手上的大屏幕智能手提電話，遞給政制及內地事務局局長譚志源，電話個「芒」實在太大了，樓上記者一覽無遺，其中一條短訊由署名「江華」發出，九成九係副局長劉江華。內容話局內同事會全力支持配合，經過各方研判，明天(周四)下午5時前完結最為上策，期望團結一心，達成目標。
照咁睇嚟，速戰速決係代表咗議事廳內「多數」的民意喎。
Ariel
** 博客文章文責自負,不代表本公司立場 **
政改方案今日起在立法會內審議，原本話周四表決，如今又有暗湧， 傳泛民有意拉布拖到周四晚稍夜時段才表決，等泛民支持者放工後可以有多啲人來立法會外聲援。
泛民可能有見周日遊行人數有限，呢兩晚在立法會外滾動集會人數又唔多，怕周四下午太早表決無乜人到，所以傳出他們想拖後的消息。若以開會每個議員發言限時15分鐘計算，有兩日時間乜都講完，原本可在明日下午表決方案，但若泛民拉布，提出中止待續議案，又或中途叫停會議點人數，就有機會拖至周四晚上才表決。
建制派對此相當慶，認為政改呢家嘢既然南轅北轍，你又說服唔到我，我又說服唔到你，不如早早投票。但若拖到周四深夜，立法會外群情洶湧，即使安排好議員集體離場， 都相當麻煩。
所以建制派的反制方法是你拖我又拖，若未能在明晚8時前表決，建制派就幫幫手拖到星期五早上才表決。
建制派事先張揚，等泛民自己計數，等如話你拖都無用，拖唔拖就自己諗啦。Ariel就話，搞咁多事做乜鬼，星期四表決 咗佢算啦。
