多名撬票對象已發言 否決方案成定局？

政改方案表決進入最後直路，首日辯論已有超過三分之一議員發言，泛民的「大嚿」陳偉業直言，高危轉軚的議員今日已發言，明確話會否決政改方案，相信唔會有泛民議員會轉軚。

睇番今日發言的泛民議員中，包括咗一直被外界視為政府主力撬票的對象，包括咗李國麟、湯家驊、梁繼昌、葉建源、民主黨主席劉慧卿先後在發言中表明會否決方案。

李國麟話對外界視佢為「轉軚王」感到奇怪：「政府提交立法會嘅方案冇任何改動，市民只有投票權，我冇任何理據要轉軚支持」

梁繼昌就話有人叫佢投棄權票：「佢（朋友）叫我投棄權，令個方案唔係咁多人反對，個形象上好似好啲，但我講咗冇得傾，會投票否決」

湯家驊唔覺得有人會開心：「進入議會11年，為嘅係爭取普選，但今日就要投票否決唔理想嘅方案，我真係諗唔到今日香港有乜人會感到開心」

至於未發言的馮檢基同莫乃光都表態會否：「我已做咗決定，心情平靜，唔會支持今次政改方案」，莫：「其實都已經作出咗，睇唔到有乜轉變，轉變都唔可能最後一刻轉變」

由於政改方案必須得到立法會三分之二的議員支持，政府仲差五票先夠票，所以幾位撬票對象的溫和泛民議員已表明否決，咁即係通過方案的機會愈來愈渺茫。

Ariel

** 博客文章文責自負,不代表本公司立場 **

政改方案在立法會審議了大半日，一如所料，會上各有各講。林鄭繼續推銷、建制派力撐通過、泛民慷慨陳詞堅持否決，內容唔聽都估到佢哋講乜。

大家最關心都係幾時表決，之前有傳泛民想拖到周四晚稍夜時段，等埋支持者放工來立法會外聲援才表決，不過，有高人話估計泛民未必會拖落去。

至於政府又想幾時表決？原來上上策係明天(周四)下午五點，唔係估架，今日下午開會期間，有出席的官員將手上的大屏幕智能手提電話，遞給政制及內地事務局局長譚志源，電話個「芒」實在太大了，樓上記者一覽無遺，其中一條短訊由署名「江華」發出，九成九係副局長劉江華。內容話局內同事會全力支持配合，經過各方研判，明天(周四)下午5時前完結最為上策，期望團結一心，達成目標。

照咁睇嚟，速戰速決係代表咗議事廳內「多數」的民意喎。