北京想流會陰謀論太搞鬼

昨天政改表決出現建制派「等埋發叔」的倒瀉籮蟹事件，亦有人相信「 等發叔」不是真正理由，有激進泛民議員就提出一個陰謀論，話「 等發叔」是假，想流會推遲一個星期表決是真，仲話係阿爺的意思。

這個講法係咁，阿爺撬緊泛民5票，仲差少少，未能成功。 所以就叫建制派離場發動流會，想令會議推遲一週， 有更充足的時間，再拉那5票，令政改方案可以通過， 但卻流會不成，搞出個大頭佛。

不過據Ariel所知，這個理論創作性太強，脫離事實。 主要有兩個理由否定此說法， 第一係事發後聞說阿爺在深圳的中央要員都不知香港議員搞邊科， 所以叫好多人收風，睇吓發生乜事，並唔係成竹在胸的感覺。

第二係到最後階段，阿爺和特區政府已陷入放棄撬票的情緒中，估計郁得到的只有一兩票，無機會通過政改，所以都任由這些人自由發揮反對政改方案了，並無很緊張差少少還在盡最後努力的氣氛。

結論係好似工聯會黃國健所講，昨天的事件係一個「低級錯誤」 似啲。

Ariel

** 博客文章文責自負,不代表本公司立場 **

政改方案投票決戰爆出小冷門，唔係議案通過咁意外，在建制派議員大部份離場下，只有8票支持。

建制派議員下午開記者會，解釋出事情況，話當時是想等抱恙的劉皇發返回會議廳一齊投票， 結果未等到又叫不停會議，才會集體步出會議廳，對於在表決過程中的失誤，建制派深感遺憾， 並向一直支持政改方案的廣大市民深感歉意。不過，留在議事廳上投票的自由黨、陳婉嫻等建制派議員並無出席記者會。

街外有疑問建制派為咗劉皇發一票，要冒咁大風險值唔值得呢？聽咗咁多建制派議員解畫，印象最深之一都算係新民黨的田二少答得比較有point，佢話當時泛民有四位議員未發言，唔知佢哋的態度， 萬一佢哋態度有變，咁發叔呢一票好重要，所以強調自己選擇離場唔係「蝦碌」。

好難評論田二少當時係唔係咁諗，但佢呢個解畫已經算做比較有意思， 講得出佢地咁大動作搞到咁亂究竟為乜。