維基哥的香港電視(1137)早排發盈警， 話預計今年截至6月底止6個月的虧損將較2014年2月止6個月之虧損大幅增加，主要源於節目播放成本費用增加，及多媒體業務的不明朗因素而導致的減值損失。港視睇嚟要為搞電視大幅撇帳減值。
維基哥早前自爆話，人生遇上不如意事，遇上此路不通時，應該重整旗鼓，另走一條路。聞說他的港視會放棄電視，力搞網購，計劃將網購由網上商場的模式，加入超市模式， 大賣食品和生活用品。他近日已將客戶現金回贈比例由原來的3%，大幅提高至5至10%。過去維基哥的網購被評為價錢太貴，主要是參加網購平台的商店不願低價銷貨，而現金回贈則是由維基哥的港視提供，如今增加現金回贈，大約一半貨品有10%現金回贈，即是話維基哥的港視自行揼水打仗。
不過港視進攻超市業務，未打到百佳惠康入肉，先要鬥一鬥連鎖店7 59阿信屋。維基哥過去曾和759老細林偉駿傾過，叫759加盟他的網店賣嘢，最後傾唔掂數，759自己搞網購， 如今759計劃在8月8日推出「759 online」網站，第1階段賣食品及寵物用品，第2、 3階段會賣12蚊店家品和個人護理產品，網上售賣貨品折扣與門市相同。
759由於自己入貨，貨品定價往往比超市平好多， 維基哥的網購加埋回贈，暫時唔見比759便宜， 所以港視網購未打贏759之前，都好難挑戰到大超市啦。
Ariel
** 博客文章文責自負,不代表本公司立場 **
港大副校長任命，在學生衝入校委會會場後，變得極度政治化。 最新一爆當然係沙士英雄袁國勇宣布辭去校務委員的聯務。 他解釋自己沒有能力處理政治問題及帶領港大化解矛盾找新出路， 因此辭職讓有能力的人士擔任，自己「搞毛黴菌好過」。 他又強調辭任與其他人無關，亦並非心灰意冷。
袁教授係絕頂聰明的人，出來見記者解釋理由， 都俾番個金句大家做標題：「無力處理政治，搞毛黴菌好過」， 不同意見的人可以各自演譯袁教授辭職的原因。 旁觀的政壇高人就覺得，袁教授係一位好純正的學者， 基本上唔參與任何政治性活動同組織，相信佢真係對政治無興趣， 亦都唔想捲入政治爭議，所以乾脆辭職。 高人又覺得依家成件事咁政治化， 袁教授無論在哪一方都唔係打仗式的人物，讓佢做番學術， 再搵人入校委都未必係壞事。
在記者會上袁教授有段話，Ariel覺得幾值得一提， 佢講到在學生衝入校委會場後，盧寵茂倒下， 佢有份送盧教授上救護車，佢話在會場內出到電梯的過程中， 逼人的情況同阻力不太大，但當到樓下準備上救護車的時候， 就真係好困難，如果無警察開路，就上唔到十字車。
呢個講法亦都引證咗另一位校委麥嘉軒離開會場時遇到的難題， 她去到停車場時被示威者圍住，罵了近半小時。 麥嘉軒事後對私下對朋友表示，曾嘗試與示威者對話， 但對方根本不容她發言，只是不斷辱罵她，有人甚至表示「 如果你想走，你就要跪低道歉！」示威者又罵她「可恥！」因此她選擇保持沉默。 由於現場非常悶熱，她向校方保安表示不適， 對方才決定電召救護車及警方到場。 她炮轟校方為何不及早報警求助，甚至反而對警方到場表示遺憾。
要求「跪低」的情況，真係相當恐怖。 即使是無人可以話他是建制派的袁教授， 亦證明咗示威者唔俾校委會委員上十字車的問題。 成件事變晒質，好人好姐都唔敢去做港大校委啦。
