民主黨與中央溝通有副作用

港澳辦副主任馮巍南來香港，與民主黨領導層食飯會面。民主黨主席劉慧卿今日話，理解各方對會面有不同意見，但重申會面對雙方都重要。

卿姐十分識做，正面評價會面。Ariel亦覺得任何時候溝通都是好的，都應該支持，有助政治氣氛和諧啲，但在實質問題上，要拉近泛民和中央的分歧，真是談何容易。

在政改方案否決後，民主黨開集思會，會後何俊仁話，不應因為政改否決而放棄和中央對溝通。 所以民主黨想溝通的姿態無變，在政改之前不見面，只不過明知中央想遊說他們轉軚支持政改方案，廢事俾人鬧，所以就唔見面。政改後就唔同。

不過見完面後，無論民主黨或者建制派，只要有選區議會的，都好怕呢件事會影響選情。 有些民主黨乳鴿平時都玩開激少少的反政府風格，如今阿頭突然同阿爺飲茶，就好怕選舉中會被人狙擊。

妙就妙在建制派議員同樣有另一些擔心，佢地在地區主要同民主黨打生打死，而家阿爺突然派港澳辦副主任一個咁高級的官員落到嚟香港，和對方飲啖茶食個包，好似好老友咁，選民就會問佢地， 你地咁砌人代唔代表中央架？

無論民主黨抑或建制派的地區人士，都問點解要而家見？有無諗過對選舉有副作用？ 呢啲咁深的問題，Ariel就唔係幾識答。 你睇民主黨有參選加區選的阿哥阿姐如涂謹申和黃碧雲都唔出席見馮 巍，就知佢地大玩今天今天星閃閃，閃得就閃啦。

另外令人關注的是特區政府和民主黨，又會唔會改善關係呢？

Ariel

** 博客文章文責自負,不代表本公司立場 **

亞視前主席邱德根之子邱達昌牽頭成立的財團永升（亞洲）競投免費電視牌照，計劃投資逾41億元開三個台，包括粵語台、英語台及體育台。人人講緊傳統媒體就快死的時候，點解邱達昌仲有興趣揼咁多水搞電視台呢？

人稱老虎仔的邱達昌承認自己都真係幾勇，不過，除咗勇，佢亦都有自己一套信念。

邱達昌話電視剛剛面世時，都有人話電影會死，電影院做唔落去啦，現實係電影院自己改革，到依家仍然有佢哋的市場空間。佢認為搞乜嘢都好，至緊要係有團火(用佢的話係passion)，當然搞電視亦有資本，仲有好重要係有好的人才建立好的架構。佢舉例話拍一套好掂的劇可能唔難，但要繼續Keep住觀眾先係關鍵。

至於有乜嘢秘密武器，佢話有同團隊傾，但現階段唔可以公開住，可以講的係咩嘢唔可以搞，例如無綫依家做緊的電視製作方式、兩線劇集等等，佢哋就唔會搞啦，似乎都會行「製播分離」啦（即外購製作公司拍的節目），但首要都會係適合港人口味的節目。

老虎仔相信電視不會死，只係正在變革中，就好似電影院咁，變改後分成好多迷你影院，又要3D等等，就有存在空間啦。