數字雜誌日前偷拍息影女星鄭艷麗在麥當勞打工，喺封面大字標題話佢係脫星，仲專登刊登佢當年嘅艷照。
坊間議論好多。普遍都不值數字雜誌所為，人地好地地自食其力，點解要為難佢呢？
論件事本質，只能講係無品。好多上到位嘅電影紅星，高峰過後，好難返番落嚟，當中自殺的也不少。佢地自殺又唔一定因為生活艱難，即使家財萬貫，但想到自己年華老去，與昔日的光輝歲月講拜拜，唔係好多人可以過到關。
鄭艷麗際遇唔好，在電影圈打唔出名堂，但肯自力更生，到麥當勞打工，唔係應該俾好多Like俾佢咩？點解有人要猛講佢係脫星，又話佢「富商包」，打擾佢嘅生活，搞到人可能連份工都無埋？
當年的娛樂記者由於同圈中人諗熟，時常俾人話隱惡揚善，報喜不報憂，但自從「狗仔隊」喺大約20年前出現，整個報導文化180度急轉彎，凡係正面嘅，都唔會報導，淨係識「揭私扒糞」，唔衰講到衰！好似今期的鄭艷麗，如果佢係當紅明星，食得鹹魚抵得渴，俾你狗仔隊玩，都無法啦，但佢已經退休咁耐，打份工搵食啫，放條生路俾人行都得啩？
小鯊
** 博客文章文責自負,不代表本公司立場 **
明報事件鬧得沸沸揚揚，最終都係管理層堅持換老總，強硬收場。
事件中上演了一個小插曲，就係專欄開天窗事件。事緣係明報某些專欄作家評論明報事件，加拿大明報抽起相關專欄。抽稿事件俾李慧玲在上星期五在商台節目中踢爆，佢話，上網睇加拿大明報，發現起碼新聞都有報導相關事件，但所有專欄凡係評論香港明報事件的，都被抽起換掉。
加拿大朋友聽到李慧玲咁講，老遠從加拿大打電話嚟俾小鯊，笑慧玲姐知其一不知其二，俾人滾咗都唔知。小鯊連忙追問點解，原來李慧玲睇到的加拿大明報網上版新聞，其實係香港版新聞直接轉載，所以有報明報事件。但加拿大印刷版的明報，則將所有關於明報換老總的消息完全飛走晒。李慧玲以為佢新聞有出，就係咁樣俾人「滾」咗啦！
今個星期，香港有四個專欄作家開天窗表示抗議，加拿大明報翌日亦同樣開了四個天窗。表面睇，加拿大明報好似做了讓步。事實卻係印刷版報紙始終沒有報導過相關新聞，即使今個星期最後決定照換老總，加拿大印刷版報紙照樣無報。
加拿大老友話，報紙如何處理新聞，有其自主權，但事實就要搞清楚，佢話事件在當地華人圈都亦引起不少議論喎。
