舖租唔跌無運行

又有團體周日發起「光復上水」等行動，自由黨的批發及零售界立法會議員方剛批評，行動過於政治化。

政壇高人話，所有政治活動都政治化，那些示威團體有政治動機唔奇，自由黨評論呢的事件，將矛盾集中在特首CY，叫CY向內地人道歉，一樣有政治動機。

高人話，自由行放慢，而家呢啲代表商界利益的政黨係咁叫特區政府要求中央放更多自由行 旅客來港，呢啲要求中央不會同意，香港社會自己都承受唔起，而家叫做稍稍少啲大陸遊客，若然又多放自由行又增加番人數，做完之後，特區政和中央政府又會俾香港市民鬧，到時唔會見呢啲政黨出來挺吓政府。

佢話生意賺唔到錢要求變，一係搵多啲生意，一係就減少成本， 而做旅遊零售業的最大成本就是舖租， 唔知點解唔見呢啲政黨叫大業主減多啲租，支持吓零售業?

個別業主開始面對現實平啲租舖位出街。英皇珠寶鐘錶承租的銅鑼灣羅素街羅素街59號地下B1至B3號單 邊舖位，由英皇珠寶鐘錶租用12年，本來月租250萬， 業主一度想加到月租350萬，英皇唔願租宣佈退租。業主可能搵唔到新租客，近日剛剛大劈價以月租70萬元，以半年短租形式，續租俾英皇，租金較之前大跌7成以上，為租金跌幅最大舖位。大家唔好忘記，2003年呢個舖只係43萬 月租，加到上個租約的250萬，變咗近6倍，而家跌番少少都合理。

高人話，香港舖租太貴，不止中小企難做生意， 近日連鎖大企業都頂唔順，舖租唔跌，香港經濟無運行。

Ariel

** 博客文章文責自負,不代表本公司立場 **

本港零售銷售數字連續7個月下跌， 自由黨立法會批發及零售界議員方剛話零售業轉差是因為中港兩地怨 氣上升，限奶令和反水貨客示威令內地人不滿， 佢叫政府取消限奶令及增加自由行城市數目， 仲叫特首梁振英就應站出來澄清示威者不代表全部港人， 並為此向內地道歉，以平息對方怨氣咁話。

嘩，叫 CY向內地道歉，取消限奶，增加自由行，招招都唔係咁受市民歡迎咋喎，叫CY做，等如送佢上路。而家零售下跌，但裁員潮暫未出現，市民一啲都唔感受到痛楚，只係商舖業主和零售商覺得痛，市民仲覺得少咗遊客行街無咁人逼逼幾好呀。政府而家走去增加自由行、取消限奶令，隨時被人鬧到瞓街。

高人話，一兩年前，反水貨客的示威鬧大時，代表零售界的自由黨反應無力，反對旅客的聲音一面倒，政府惟有做嘢。到今天零售業痛到入心時，自由黨出嚟講多兩句，好似遲咗少少，政策定咗，自然唔係咁易改啦。政府好似球證那樣，那一方聲音大，得到民意支持，就唯有朝那個方向做嘢。

反水貨客的行動靜咗半年，最近可能因為零售業再發聲，又有人出來搞嘢。「上水人上水事」facebook群組及「 本土同盟」今日3時再搞「光復上水」行動，佢地話已獲警方發出不反對通知書。「光復行動」的發起者在fb話 ，上水的藥房、金舖「仲好好生意」， 又貼相證明水貨客仍霸佔街頭。自由黨方剛講兩句，只識事事將矛頭指向CY，完全無作用，根本就揀錯著力對象。如今俾反水貨客搞一場大龍鳯，好易又激發起反旅客的情緒。