唔少人都受蛀牙困擾，如何保養牙齒成為一個大難題。最近有研究可能俾到啲啟示，話古羅馬人牙齒相當健康，甚至比現代人仲要健康好幾倍。當年未有牙醫呢門專科，啲人亦無咩意識保養牙齒，但係竟然好少人蛀牙，原因極可能同低糖飲食有關。
年中有科學家用電腦進行斷層掃描，檢查意大利龐貝古城出土嘅30具羅馬人遺體，男女老少都有，全部死於公元79年維蘇威火山爆發而產生嘅火山灰同埋飛石。經過幾個月研究，研究員發現呢班羅馬人牙齒好得驚人，認為都係歸功於佢哋低糖富含纖維嘅「地中海飲食」習慣。
「地中海飲食」係近年營養師推薦嘅健康飲食法，主張進食大量蔬菜，其次係魚類同瘦肉，以植物香料代替鹽，並且唔會攝取橄欖油以外嘅油份。龐貝城古蹟總監Massimo Osanna形容龐貝古城羅馬人嘅飲食健康又均衡，幾乎滿足晒地中海飲食嘅要求。
據講其實英國15至17世紀英國都鐸王朝時期嘅人都有相當健康嘅牙齒，最靚者要數推動宗教改革嘅亨利八世。當年啲人牙齒健康，原因同羅馬人一樣係低糖飲食。係16世紀英國「童貞女王」女王伊麗莎白一世因為鍾意甜食以致一口爛牙，令外界誤以為當年啲人牙齒一樣咁衰。
17世紀開始，製糖技術喺西班牙、法國同埋荷蘭變得普及，糖以及相關產品價格暴跌，糖先由奢侈品變成歐洲人餐枱上常見嘅嘢，亦象徵人類爛牙年代來臨啦。
原文呢度：
http://www.telegraph.co.uk/news/worldnews/europe/italy/11902097/Ancient-Romans-had-perfect-teeth-thanks-to-healthy-low-sugar-diet.html
http://qz.com/521871/apple-is-blocking-its-news-app-from-everyone-in-china-even-if-their-phone-is-registered-in-the-us/
神州快訊
** 博客文章文責自負,不代表本公司立場 **
唔知幾時開始網上直播私生活成為潮流，有人索性連工都唔返，淨係日日對住鏡頭食飯，每月收入達到廿幾萬港元。膠仔上網查咗幾查，發現大部份騎呢副業都係由日本人發明；除咗直播之外，仲有好多方法可以名成利就，簡單講兩句。
【偶像踢】24歲靚女野形仁美係一名專業拳手、副業係模特兒。唔好睇佢瘦孟孟咁呀，踢起人嚟都好大力。佢某日忽發奇想再開創另一份兼職，專門踢人pat pat，喺街頭免費「醒」男士兩腳，呢項騎呢服務竟然大獲好評，有關片段更令佢成為網上紅人。曾有電視台訪問佢，主持都會請佢踢返兩腳。最近東京一間創投公司更決定出錢支持佢繼續踢人，藉此鼓勵當地女性成為YouTuber。
https://youtu.be/aWh8-sGAISM
【出租Uncle】伊東孝西本現年47歲，喺當地時裝界有一定地位。佢工餘時間會以每小時八美元價格「出租」自己，陪客人食飯、Shopping。佢至今已經接待過超過1,500名客戶，大部份係女士或者年輕人。班客仔搵佢出嚟絕非解決生理需要，而係因為一顆寂寞的心，生活、家庭、朋友或者事業遇到阻滯，苦無傾訴對象，想搵人傾計。伊東孝會同客人分享自己經驗，又或者係提供可行建議。唔少人都話佢俾到意見中肯實用，傾完計後心情靚晒。就係因為咁，呢門生意愈傳愈開，搞到佢分身不暇，要聘請其他「生活導師」幫忙。
【罵人】28歲演員吉木理沙出道之初以火辣寫真上位，尺度堪比AV，膠仔咁冷靜都睇到血脈沸騰；去年主持東京電視台節目《我想俾理沙罵》後知名度更高。佢喺節目要做嘅嘢就係對住鏡頭瘋狂大罵，以激烈措辭盡道社會上種種不良現象。佢衣着打扮相當斯文，同節目中暴躁表現形成強烈對比，但係觀眾竟然好受落。有訪問話日本人過咗30歲後，身邊愈嚟愈少人願意提點自己錯處，所以呢類節目可以迎合好多人需要。結果係點？吉木聲名大噪，廣告代言接唔停囉。
最後都係補上原文：
http://asia.nikkei.com/Life-Arts/Life/The-odd-allure-of-being-kicked-and-berated
