政事
港大校委會新主席人選，最快周五刊憲。早前傳出港大醫學院榮休教授楊紫芝、校委之一的青協總幹事王䓪鳴 、以及另一校委、港大醫學院外科系主任盧寵茂都可能做校委會主席。 不過這些人選的揣測，可能只是反對李國章做主席者一廂情願的想法。
Ariel和知情人士講起楊紫芝，認為佢固然德高望重，但其中年紀已相當大，楊紫芝1947年以僅16歲之齡，入讀港大醫學院，畢業後一直在港大及瑪麗醫院工作，做到1999 年正式退休。退休都是16年前之事，如今計落已是84歲。 如果李國章70歲年齡都唔細，咁楊紫芝就更大。況且搵佢和搵梁智鴻無太大分別，不如留76歲的梁智鴻做下去啦。
至於盧寵茂，過去好似無現職教授做校委會主席的前科，而且盧教授志不在做呢個位，你叫佢做港大校長佢就有興趣。
講到王䓪鳴，又出現和梁智鴻無分別的問題。 另外港大學生會會長馮敬恩亦打開口牌，批評王䓪鳴同李國章一樣是 「極端嘅人」，並不適合擔任主席。知情人士話， 睇嚟學生都無任何讓步空間，其他花生友成日叫政府讓步，只係自己一廂情願的想法。
結論係除咗李國章之外，仲有邊隻馬跑緊呢？
Ariel
** 博客文章文責自負,不代表本公司立場 **
現代人成日用手提電話，但手機的竊聽技術就日新月異，仲搞到非常之廉價，真係相當得人驚。
昨日1010推出新的加密電話Blackphone，請咗幾個名人來分享有關防止手機俾人竊聽的經驗。
左起：陸羽仁、周嘉儀、莊文強、CSL Mobile市場營銷總裁林國誠
開拍咗三集竊聽風雲的導演莊文強話，佢哋拍戲時要不停做資料搜集，甚至自己還嘗試去用網上的軟件砌一啲勾線的器材，點知後同事話俾佢聽，自己砌一部就要2000元，但係去深圳華強北路買一部就170幾元人仔，攞番嚟一試，仲可以勾到十條線，認真得人驚。
本網的財經博客陸羽仁亦有出席活動，佢講到同一個政經猛人會面時，那位猛人唔單止要佢將電話放喺會議室之外，仲特備一個金屬的鐵箱，要將電話鎖入鐵箱內，原因係依家的偷聽技術非常之先進，即使你關了電話都無用，電話本身亦可以被遙控成為竊偷器材，關咗機都可以俾人用來竊聽，唯一係將電話的電池拆走，先可以預防得到。問題係依家好多聰明電話，例如iPhone，電池不能拆走，所以部手機本身就係一個竊偷工具。
陸羽仁話佢自己同一家上市公司傾過一個交易，期間個股價即時上升，對方好驚電話被人偷聽，結果雙方都買咗兩張新的太空咭，講到機密嘢，就只能用太空咭電話去講。
Ariel聽完佢哋講，都發覺呢個世界認真恐怖，一係買部保密電話，否則有乜機密嘢，都係唔好用手提電話講啦。
