何俊仁輸得抵

2012年經「超級區議會」選舉晉身立法會的5名立法會議員，除了部署退休的陳婉嫻外，其餘4人都有出戰今屆區選，但僅民建聯李慧琼及民主黨涂謹申連任，民主黨何俊仁及民協的馮檢基雙雙墮馬。

泛民超級區議員受建制派狙擊，唯一出線的民主黨的涂謹申在油尖旺奧運選區，亦僅以117票險勝對手高曉榮當選。

而爭取在深水埗麗閣選區連任的民協馮檢基，亦以99票之差，被25歲工聯會「小花」陳穎欣撃敗。馮檢基得2432票，過往是民協黨友的黃仲棋得215票，馮檢基指自己被黃仲棋鎅走了這200幾票。值得注意的是馮檢基在上屆區選也拿2528票，今次明顯流失了部份選票。從被鎅票的角度，馮檢基可說死得唔抵，但政壇高人亦指出，事實證明咗馮檢基的「鐵票」不是死忠的票，否則不應該流走。

民主黨何俊仁在屯門樂翠選區已做了4屆區議員的，今次以200多票輸給建制派何君堯，何俊仁事後指不會歸咎熱血公民的鄭松泰「鎅票」，會自我檢討。何俊仁的確不應歸咎被鎅票，因為他對手何君堯同樣被鎅票。

今次區選何君堯得2031票，何俊仁得1736票，鄭松泰得391票，阮偉忠得99票，沈錦添得94票。曾任屯門鄉委會主席的何君堯，與獲新界王劉皇發力挺的沈錦添同區出選，理論上沈錦添也會鎅走親建制票。但實際上何君堯吸票能力強，沈錦添只拿走94票，上屆區選沈錦添有1477票，今屆他的票全被何君堯吸走。

相對地何俊仁就好弱，他上屆區選得1876票，今屆少了140票，上屆同屬泛民激進派的陳偉業拿了303票，今次何俊仁搶不到這些票，反而給熱血公民的鄭松泰拿走了。估計他在立法會睇AV女郎玉照，在競選時被路人揶揄做「AV仁」，也影響了女姓選票。所以他可以話死得抵，不將失敗歸咎熱血公民的鄭松泰「鎅票」，也算有自知之明。

Ariel

** 博客文章文責自負,不代表本公司立場 **

重建後嘅皇崗口岸喺2026年10月12日正式開通，實施「一地兩檢」同「合作查驗、一次放行」，仲要24小時通關，真係好方便。開通接近一個月，平日日均出入境人次已經超過86,000，比以往落馬洲管制站多咗成倍；去到週末同假期，日均更加直逼140,000人次，受歡迎程度可見一斑。

不過，人潮多咗，交通需求大增，政府就留意到有市民同旅客貪方便，搭咗啲跨境私家車往返兩地，而且當中部分係非法出租或取酬載客嘅「白牌車」。呢啲車無合法嘅出租汽車許可證，做生意屬刑事罪行。為咗保障乘客同道路使用者安全，政府近期已經明確表示高度關注，執法部門亦加強咗打擊，除咗依法檢控違例司機，仲會扣押涉事車輛。運輸署同警方亦都密密做宣傳，除咗於官方網站及社交媒體發放訊息，運輸署亦向封閉道路通行許可證持有人以及指定跨境駕駛計劃批准信持有人發出電郵，直接提醒相關車主唔好以身試法，列明違法嘅嚴重後果，同時呼籲市民要認清風險。

警方近日在新皇崗口岸拘捕一名42歲持雙程證的內地男司機，涉案豪華七人車亦被拖走扣留檢驗。

可能有人會諗：「有人肯車我，價錢啱咪得囉，做乜要搞咁多嘢？」但高人提醒，從市民自己嘅角度出發，坐「白牌車」其實係一場「搵命搏」嘅賭博，主要有兩大風險：

第一，保險隨時有機會失效，意外隨時面對索償無門。

合法嘅跨境出租車必須持有常規配額、封閉道路通行許可證同出租汽車許可證。但「白牌車」冇呢啲牌，一旦發生交通意外，提供非法服務嘅車輛，佢嘅第三者責任保險係有可能會失效。即係話，如果坐白牌車出事受傷，甚至造成傷亡，你有機會追究無門，無法獲得應有嘅賠償。為咗貪一時方便，將自己同家人嘅安全較飛，值唔值得咩？

第二，罰則極重，唔好以為只係抄牌咁簡單。

根據《道路交通條例》第374章第52(3)條，無牌載客屬刑事罪行。警方會用「放蛇」方式去蒐證，亦會喺口岸一帶同黑點加強巡邏。一旦斷正，首次定罪最高罰款港幣10,000元、監禁6個月，車牌吊銷6個月；如果再犯，最高罰款25,000元、監禁12個月，車牌吊銷12個月。涉案車輛喺吊銷牌照期間要交畀運輸署保管，司機更會被停牌最少12個月至3年。運輸署仲會撤銷埋涉事車輛嘅封閉道路通行許可證。如果涉及內地司機，警方仲會查埋係咪非法勞工或者違反逗留條件，轉交內地執法部門跟進。

其實皇崗口岸嘅交通配套正逐步完善，港九新界都有合法交通工具直達，包括7條專營巴士（6條日間、1條通宵）、3條日間同3條通宵專線小巴、5條短途跨境巴士同長途跨境巴士，仲有市區的士、新界的士同車隧的士。

高人話，政府打擊「白牌車」，並唔係要阻礙大家出行，而係要守住安全底線，同時可令皇崗口岸更暢順。對市民來講，搭合法交通工具先可以保障自己同屋企人。