陳太開壇得一個聽眾 憤而離場

港大學生會昨日早上召開「香港未來想像論壇」，請咗前政務司司長陳方安生出席，與港大社會科學院院長卜約翰（J ohn Burns），同場講「公務員制度與特區政府管治困局」。

論壇原定10點開場，點知只有一個學生到場聽嘢，少過記者。 陳四萬等咗10分鐘見無人到，黑晒口面，話聽眾太少難以互動，叫港大學生會下次安排好啲再搞過，就起身走人，場面尷尬。

陳四萬做過政務司司長，即使當佢唔識學術問題，同場的卜約翰絕對係研究香港公共行政的權威， 佢31年前編輯咗本書The Hong Kong Civil Service: Personnel Policies and Practices (co-edited with Ian Scott ) ，已經是當年讀政治學的學生，學公共行政時的必讀教材，論學術卜約翰比陳太更有份量。

Ariel同大學生傾吓點解無人去呢個論壇，佢地話睇時間同題目都知唔掂啦，第一係題目太悶，有興趣的人少，第二係星期六上午10點都算係必敗時間啦，返完成個星期學，星期五晚wet完，星期六中午12點都未起身啦，邊有人咁神心爬起身去論壇。有一個學生咁稀有品種到場，陳太唔應該走，應該好細心同佢講解至啱。

當大家以為陳太係名人，會吸人到好多學生去聽，其實學生既不信權威，即使反政府亦唔使聽啲老人家教，而且好多人都唔識陳太，點會為佢瞓少幾粒鐘去聽講座呀。

Ariel

** 博客文章文責自負,不代表本公司立場 **

重建後嘅皇崗口岸喺2026年10月12日正式開通，實施「一地兩檢」同「合作查驗、一次放行」，仲要24小時通關，真係好方便。開通接近一個月，平日日均出入境人次已經超過86,000，比以往落馬洲管制站多咗成倍；去到週末同假期，日均更加直逼140,000人次，受歡迎程度可見一斑。

不過，人潮多咗，交通需求大增，政府就留意到有市民同旅客貪方便，搭咗啲跨境私家車往返兩地，而且當中部分係非法出租或取酬載客嘅「白牌車」。呢啲車無合法嘅出租汽車許可證，做生意屬刑事罪行。為咗保障乘客同道路使用者安全，政府近期已經明確表示高度關注，執法部門亦加強咗打擊，除咗依法檢控違例司機，仲會扣押涉事車輛。運輸署同警方亦都密密做宣傳，除咗於官方網站及社交媒體發放訊息，運輸署亦向封閉道路通行許可證持有人以及指定跨境駕駛計劃批准信持有人發出電郵，直接提醒相關車主唔好以身試法，列明違法嘅嚴重後果，同時呼籲市民要認清風險。

警方近日在新皇崗口岸拘捕一名42歲持雙程證的內地男司機，涉案豪華七人車亦被拖走扣留檢驗。

可能有人會諗：「有人肯車我，價錢啱咪得囉，做乜要搞咁多嘢？」但高人提醒，從市民自己嘅角度出發，坐「白牌車」其實係一場「搵命搏」嘅賭博，主要有兩大風險：

第一，保險隨時有機會失效，意外隨時面對索償無門。

合法嘅跨境出租車必須持有常規配額、封閉道路通行許可證同出租汽車許可證。但「白牌車」冇呢啲牌，一旦發生交通意外，提供非法服務嘅車輛，佢嘅第三者責任保險係有可能會失效。即係話，如果坐白牌車出事受傷，甚至造成傷亡，你有機會追究無門，無法獲得應有嘅賠償。為咗貪一時方便，將自己同家人嘅安全較飛，值唔值得咩？

第二，罰則極重，唔好以為只係抄牌咁簡單。

根據《道路交通條例》第374章第52(3)條，無牌載客屬刑事罪行。警方會用「放蛇」方式去蒐證，亦會喺口岸一帶同黑點加強巡邏。一旦斷正，首次定罪最高罰款港幣10,000元、監禁6個月，車牌吊銷6個月；如果再犯，最高罰款25,000元、監禁12個月，車牌吊銷12個月。涉案車輛喺吊銷牌照期間要交畀運輸署保管，司機更會被停牌最少12個月至3年。運輸署仲會撤銷埋涉事車輛嘅封閉道路通行許可證。如果涉及內地司機，警方仲會查埋係咪非法勞工或者違反逗留條件，轉交內地執法部門跟進。

其實皇崗口岸嘅交通配套正逐步完善，港九新界都有合法交通工具直達，包括7條專營巴士（6條日間、1條通宵）、3條日間同3條通宵專線小巴、5條短途跨境巴士同長途跨境巴士，仲有市區的士、新界的士同車隧的士。

高人話，政府打擊「白牌車」，並唔係要阻礙大家出行，而係要守住安全底線，同時可令皇崗口岸更暢順。對市民來講，搭合法交通工具先可以保障自己同屋企人。