長毛也被包圍　版權條例暗戰

鍵盤戰線等十多個民間團體昨日在旺角行人專用區搞記者會，呼籲市民反對人稱「網絡23條」的版權修訂條例草案，社民連立法會議員長毛梁國雄與出席者起爭拗，長毛被圍一個多小時，最後在警員護送下離場。

參加記者會的團體包括鍵盤戰線、多個傘後組織、熱血公民等。他們認為政府的草案仍有灰色地帶，表明星期三會包圍立法會，要求議員拉布。其實記者會前有多名戴口罩市民現身，以粗口指罵長毛，問佢會唔會幫忙拉布，他就反駁話：「 你會唔會食飯。」

到人稱四眼哥哥的學生前線成員鄭錦滿發言時，要求議員拉布， 話即使泛民全投反對票，都無法阻止議案通過，目前只有黃毓民提出了逾900項修正拉布，「 自命激進民主派的議會內政黨如人民力量、社民連都要立即表態，加入拉布，拉倒惡法。」

長毛聞言就衝前搶去鄭錦滿手中無線咪，話「 毓民成日拉布都唔喺度，講嘢」。結果就變成粗口罵戰，搞到記者會都要草草收場，不滿者繼續包圍長毛，質問他是否加入拉布，後來長毛回應話「毓民昨日嚟搵我，話驚佢頂唔住，叫我幫手拉布，我已經應承咗啦」，仍不獲放行，被人包圍近一小時，場面一度混亂，有圍觀的市民被推倒在地。最後長毛在警員護送下，走了多個街口，才登上的士離去。

版權條例面對的政治形勢複雜，四眼哥哥話「 即使泛民全投反對票都阻唔到議案通過」， 一語道出泛民內部的矛盾，就如民主黨立法會議員單仲偕， 也一早表態支持修改法例，佢話收到好多反對草案的意見， 但草案已作出六項豁免，包括網民最關注的問題。

單仲楷話有關草案討論了近10年，外國政府好關注香港侵權，若草案被否決，香港有可能遭美國貿易代表處列入《 特別301法案》監察名單，令本港聲譽和經濟利益受損。

美國在背後力挺法案通過，以保障美國公司的版權利益，美國駐港總領事夏千福曾約見反對版權修訂條例的立法會議員，話美國好關注香港有無決心保障版權。所以版權法修訂，係一場暗戰，政府似乎在美國壓力下修例，唔少和美國關係友好的泛民，只係打「因住波」去反對。

Ariel

** 博客文章文責自負,不代表本公司立場 **

馬時亨未上任做港鐵主席，已遇著高鐵的大頭佛，港鐵同埋政府搞出為高鐵融資的方案，建議港鐵派每股＄4.4的高息，為高鐵超支填數。講白啲係由庫房找數，港鐵小股東得利，換取小股東同意港鐵作出為高鐵包底的承諾。

高鐵超支咁多預咗社會上有不少批評聲音，無論什麼方案都會挨鬧，不過，相信政府中人都無想過鬧得最勁的不是泛民議員，而係建制派經民聯議員張華峰，佢在報章撰文狠批港鐵玩弄巿民和議員，若非「暗騙」即是「明搶」，佢認為派高息利誘小股東，希望他們「見利忘險」，猶如糖衣毒藥，形容方案「搵笨」之至。齋睇文章用詞都好厲害，唔睇署名，相信好多人都以為係泛民議員的意見。

接咗個盪手山芋的馬時亨今朝連走多個電台，似有反擊之意，回應被批評派發特別股息是「糖衣毒藥」的講法，話政府就高鐵造價封頂，代表港鐵要包底，小股東要承受的風險增加，而風險與回報是相對，港鐵要給予小股東特別股息，作為相應的回報。

佢又話依家每項香港大型工程差不多都有超支，連自己住所的裝修工程都超支，不認為當年港鐵估算高鐵造價為650億是預算錯誤。

政壇中有人估計，馬時亨的政治手腕一向不弱，佢有份幫手度出呢個方案，唔知事前估唔估到，最勁的批評竟係來自金融服務界的建制派議員，今朝聽時亨哥反駁「糖衣毒藥」批評，就似乎特別嚴肅肉緊啦。

來年2月後高鐵方案上立法會，惡戰連場，政府搵到馬時亨做港鐵主席，都算多個「戰將」啦。