陳志雲輕判揭秘：法官以「非貪污案」定罪

陳志雲案發還高院重審，原本判陳志雲無罪的暫委法官潘兆童，再審仍然輕判，不但不判監禁，即使緩刑也不判，只判陳志雲罰款84,000元。

其實今日上半場已對控方極不利，控方另要求法庭根據防止賄賂條例33A條，頒令禁止陳志雲受僱於案發時任職的電視廣播公司，這是防賄條例在1980年生效後首次作出申請，法官斥責話，他已多次強調本案案情輕微，兩名被告亦非不誠實，他不明白控方何以要在本案作出首次申請。

聽到法官話案情輕微，控方已經滴汗。到求情階段，讀出電視廣播非執行董事邵方逸華的求情信，人稱六嬸的方逸華話，如果陳志雲事前向她申請主持涉案的奧海城活動時收取酬金，她亦會批准。由於六嬸當時也是陳志雲上司之一，她的求情就成為法官輕判的理由。

不過最吊詭的是陳志雲因防止賄賂條例入罪，但潘兆童法官卻說不能以「貪污」形容此案。客觀上就成為一單不是貪污的貪污案，自然不會重判。

成件事起因係潘兆童法官在原審判陳志雲無罪，律政司上訴，上訴庭話潘官判錯案，發還俾佢再審，佢再審一次，雖然判志雲大師有罪，但就話不能以貪污形容，決定輕判了事。

呢場仗未打完，律政司勢將就陳志雲的判刑上訴，而陳志雲自己會就定罪向終審法院上訴，志雲大師最後能否脫身，仲要睇上級法院點判。

Ariel

** 博客文章文責自負,不代表本公司立場 **

政府有意委任人稱亞瑟王的前中大校長李國章，出任港大校委會主席，雖然拖左一段時間，拖到區議會選舉之後，但係最後都好大機會成事，現時已是港大校委的亞瑟王，好有機會坐正做港大校委會主席。

李國章做港大校委主席呢份無薪工作，一啲都唔易做。政界人士分析，他的任命主要面對兩大方向的反彈，第一係在陳文敏任命副校長事件上的質疑，針對佢代表政府，未來仍會以政府角度干預香港大學嘅事務，第二，係針對佢過去曾經作為中大校長，討厭港大，唔會為港大爭取利益。

政界人士話，你話李國章討厭香港大學，愛護中大，只係一種過時嘅睇法，佢當年係中大校長，當然討厭香港大學，但屁股指揮腦袋，到佢出任港大校委會主席的時候，自然會喜愛港大，可能會變咗討厭中大㖭。

不過因為陳文敏事件結下的樑子，呢啲矛盾就唔係咁容易化解，即使亞瑟王唔理外面的泛民主派，佢亦都要面對校內反對佢嘅學生同埋老師，雙方的對立氣氛，唔係可以一下子玩結。

不過政界人士話，李國章在學術上絕對夠格，做港大校委會主席，佢當年搞中大嘅時候，搞到蒸蒸日上，中大嘅排名節節向上。如今港大正值校內風雨飄搖，排名續跌的日子，如果唔理政治，只講大學發展，搵到李國章呢個猛人助拳，絕對係有利港大重新振作，起學術水平上面，更上一層樓。