公民黨湯家驊辭職後新界東有議席出缺,補選下月5日開始提名,呢場選舉無論建制或泛民都可能有多個一人參選,想協調的可能性極低。
泛民主派盡力協調,推薦公民黨大律師楊岳橋出選,由於區選後傘兵組織青年新政聲勢頗大,所以公民黨主要和青年新政協調,對方亦表示不參選。但最近情勢又變,另一傘兵組織本土民主前線又話積極考慮派發言人梁天琦參選,話想將本土理念帶到主流社會,又要「懲罰公民黨」,認為這個議席不應再由公民黨人出任。
而話不參選的青年新政又話自己和本土民主前線理念相近,在補選中有合作機會支持對方,即係青年新政自己唔選但支持他人和公民黨競爭。另外區選失敗的新思維副召集人黃成智,也未排除派人出選的可能性,話1月7日籌款活動後才決定。
泛民協調唔到,建制派亦不一定協調到,民建聯副主席周浩鼎話明參選,但自由黨東區區議員李鎮強也動作多多似乎在熱身。而上次立會選舉高票落選的方國珊亦表明積極考慮參選,佢仲對外界強調自己是真正獨立,中聯辦未有勸阻她參選咁話。
政壇高人話,補選七國咁亂,亦都好正常,因為呢個位只有幾個月命,明年9月又要選過,本來無甚價值,唯一的價值就是各方想去練兵。既然係練兵,咁協調嚟都無謂,不如大家都落場玩玩,測試吓自己的支持,對9月再次參選時就十分有利。
Ariel
** 博客文章文責自負,不代表本公司立場 **