膠仔有個朋友經常將人哋母親掛在嘴邊，朋友都話佢唔講粗口就唔識講嘢。佢琴晚食飯忽然拎咗篇報道俾我哋睇，話爆粗其實有益身心，鼓勵一班朋友講多啲。報道引用好多研究結果印證爆粗於身體同社交都係有益而無害，其中一個實驗好騎呢，大家不妨跟住做試試爆粗係咪咁有效。
英國基爾大學心理學家2009年發表研究報告，話講粗口可以有效緩解疼痛。研究員邀請67人分成兩組接受測試，雙手放入冰水中睇吓可以忍幾耐。一組人要瘋狂講粗口，另一組人就不能講不文語句，結果發現爆粗組可以忍受更耐。我睇到呢度笑咗出嚟，幾十人一齊插隻手落冰水度爆粗，場面都幾震撼。
美國麻省人文學院心理學家Timothy Jay過去35年一直研究粗口文化，其中一篇論文提出「粗口係人類生活中不可或缺嘅重要部分」，話任何禮貌語句都無法比擬「操你X」嘅內涵。佢認為粗口可以用嚟表達任何情緒，憤怒、喜悅、驚訝、幸福等，一概可以透過講粗口展現。
著名心理學家Helen Ross早於1960年發表過一份論文，提出人類喺情緒受壓時粗口出現率會上升，但就遠遠不及快樂時候爆粗次數多。佢將呢個現象形容為「粗口社交」，認為一個人放心喺一個圈子內爆粗，咁就足以證明佢成為呢個社交圈子嘅一員。換句話說，若有人肯向你講粗口，其實佢已經當你係朋友啦。
原文如下：
http://qz.com/585039/swearing-its-fXXXing-awesome/
神州快訊
** 博客文章文責自負,不代表本公司立場 **
根據香港統計處數字，本港2013年有55,274項結婚申請，但係批出嘅離婚令亦多達22,271宗，即係每有10對新人結婚嘅同時就有4.03對夫婦離婚。膠仔有兩位前輩都同老婆辦緊離婚手續，兩個大男人為咗子女撫養權、資產分配同埋贍養費搞到一頭煙。早兩日出嚟飲嘢聽佢哋「鞋鞋」聲，聽到我都好煩厭，事後諗咗好耐「究竟姻係目的係乜」，卻無諗過離婚率上升都竟然可以造就一門新生意。
美國西雅圖Swanluv係一間初創企業，睇準當地離婚率超過50%呢一點，發起眾籌推出獨有婚姻貸款服務，鼓勵大家維持婚姻和諧。佢哋會借出10,000美元俾合資格新人舉行夢幻婚禮，唔離婚唔使還。若然最終離婚，客戶要連本帶利俾返間公司。結婚年期愈長，利息愈高。
創辦人兼行政總裁Scott Any形容呢項服務有如「婚姻賭場」。佢話希望每個人都有段美好婚姻，願意資助大家舉行童話式婚禮，提供個賭博機會：「連咁樣賭一次都唔願意，咁你不如唔好結啦！」任何新人通過人際關係審查後就可以獲得貸款，合約上仲有特別條款寫明如果婚姻係因為家暴問題結束，施暴一方須負起全部還款責任。為保障夫妻關係和諧，公司仲會成立一支婚姻諮詢隊伍。
Scott Any認為呢項服務或多或少係借別人婚姻幸福嚟圖利，難色引發爭議，但佢認為服務出發點都係為咗大家好。佢又認為從數據嚟睇公司維持運作並非難事，加埋廣告收入絕對有利可圖。一班合夥人已經同幾名商業天使討論過，相信可以獲得注資，預計明年2月14日情人節正式開始運作。
原文喺呢度：
http://www.geekwire.com/2015/this-startup-will-pay-for-your-dream-wedding-but-only-if-youre-willing-to-be-you-wont-get-divorced/
Swanluv網站：
http://swanluv.com/
香港統計處結婚及離婚趨勢資料：
http://www.censtatd.gov.hk/fd.jsp?file=B71501FA2015XXXXB01.xls&product_id=FA100055&lang=2
