一單國際八卦新聞吸引眼球，曾揭發法國總統奧朗德密會女星嘉耶的攝影師羅斯坦（Pascal Rostain）爆料，話美國總統奧巴馬與樂壇天后Beyoncé有染，更稱美國《華盛頓郵報》有料，雖然羅斯坦事後補鑊話「吹吓水啫」，《華盛頓郵報》亦否認有料，但消息仍然激起好大迴嚮。
不過呢個世界唔係否認就無新聞，愈否認愈令人覺得有古怪，不知大家有無睇過一套美國劇集《醜聞》(Scandal, 明珠台都播過)，劇中美國總統狂戀上女公關顧問，情節同奧巴馬的狀況又似似地喎。
做得總統，本來已經有過人的條件，登上美國總統的寶座後，成為全球最有權力之人，更加有吸引力啦。我曾經在香港見過剛落任的前美國總統克林頓，不知是否時差問題，本來無厘神氣，但電視攝影機一對著他時，馬上變成另一個人，神采發揚，魅力四射，意氣風發，我馬上明白為什麼20多歲的萊温斯基會和60歲的克林頓搞上。剛50出頭的奧巴馬，自然吸引力更強啦。
以克林頓的偷食「經驗」為例，參考埋Scandal的情節，奧巴馬具備出軌三大要素。第一，已到第二屆任期。美國總統最多做兩屆，做到第二屆，已經無再選的壓力，通常在這段時候最易胡作非為。
第二，同老婆愈行愈遠。在第一屆競選連任時，總統夫婦都要扮恩愛，但選舉一過，就可以回復正常。當年克林頓一連任好快就傳出夫婦不和。奧巴馬都一樣，近年他外訪第一夫人米歇爾好少同行，最近放假時也不是同步離開，兩人感情出問題的感覺明顯。
第三，偷食最緊要就手。美國總統身邊有大班特工保護，不易出外偷食，不似法國總統咁自由，所以偷食就搵較常接觸的美女，克林頓搵白宮實習生，Scandal中的總統搵經常見面的公關顧問，今次傳聞女主角 Beyoncé與奧巴馬是好朋友，兩家人經常見面，Beyoncé曾在奧巴馬就職禮上獻唱。米歇爾上月50歲生日派對，Beyoncé亦是座上客獲邀表演。見面咁多，出事的機會亦多。
你可能會奇怪，美國總統咁忙點解仲得閒搞婚外情? 正係因為美國總統咁忙壓力咁大，先至容易和太太出現感情問題，美國政客由議員選到總統，恩愛婚姻都好多表演成份，愈演愈假，真愛難存。
盧永雄
《香港晨報》正在籌備創刊，行家食飯八起，都善頌善禱，覺得有人出來搞報紙都是好事，起碼多啲就業機會。
有人問起我搞份綜合性收費報紙要多少錢? 我話啟動時三、五千萬就得，但出版之後，使費就大好多，條數要慢慢計。一張收費報紙，典型的成本係紙價、印刷加發行費一大項，人工另一大項，其餘就燈油火臘等其他費用。搞收費報紙人工加出報紙成本是兩個最大開支。
傳聞《晨報》請400人，以平均25000月薪計(已估得較低)，都要1000萬一個月，一年要1億2000萬，請注意400人做一張大型綜合性報紙，人數偏少，其他大報有700至900人，即使扣除印刷廠的100人，亦遠比傳聞中《晨報》的人手多，如何以少人鬥多人，已是一個大問題。
再講印刷等費用，傳聞《晨報》出紙20萬，以大報出紙5至6叠計，印刷發行等相關成本要約6元一份，即是120萬元一日，3600萬一個月，4億3800萬一年。當然，若出紙少一半得10萬一日，此部份開支就減半。兩項大成本相加一個月已經4600萬，再加其他濕碎成本，5000萬一個月都未必夠，一年要6億成本。即使減一半紙出10萬紙一日，一年開支都要3億8500萬，唔係細數目噃。呢個數完全無計自己起印刷廠，若要自己建廠，脆脆地另外要10億。
你可能會話，成本係咁多，但係會有收入。好理想咁講，一份報紙賣7元報館收4.2元(其餘由發行公司和報販、便利店收)，發20萬份如果賣到九成，一日收番76萬，一年咪收番2億7600萬囉，賣到咁多紙，再搵番3億幾廣告，發行收入加廣告收入，就頂到6億成本，咁咪可以打平賺錢囉。
記住呢個係理想，現實往往同理想有差別，《蘋果》非賽馬日都係賣17萬紙，你估話吓就賣到20萬份呀? 據資深報紙發行業人士話，《晨報》想賣到紙，唔止要平，仲要超平，人地賣7元一份，佢賣5元，甚至2元，就有少少可能去到紙。而按的報紙發行的行規，賣5元報館只能收3元，賣2元，仲要倒貼1元俾報販和發行商，即係話賣到2元一份時，唔止無發行收入，一年仲要貼7300萬，一年總開支上升到6億7300萬元! 幾時先至搵到6億幾廣告? 你話咁唔好賣咁平咪得囉，但賣正常價錢7元又去唔到紙，一樣係死喎。
《蘋果》95年創刊時就係用2元一份大燒錢的方法(當時其他報紙賣5元)，去打開市場，當年報業市場好好，《蘋果》亦好勁，非常賣得，廣告係咁流入，廣告價一年加咗三次，但佢都要花咗5億，先至去到經營打和的境地。《晨報》同當年《蘋果》比又點比呢?
搞報紙是一個燒大錢的遊戲，未創刊只俾人工幾百萬、1000萬一個月，都唔太恐怖，一開始出版，開機印報紙，就要4000、5000萬一個月成本，一個月只收到幾百萬廣告一啲都唔奇，一年輸4、5億就等閒事啦。仲要咁諗，你出招打人，唔可以預對手唔識還招，一打就係持久戰。《蘋果》20年前都要輸5億才打平，咁《晨報》有番10億在手，都可以玩吓呢個遊戲。
盧永雄
