《香港晨報》正在籌備創刊，行家食飯八起，都善頌善禱，覺得有人出來搞報紙都是好事，起碼多啲就業機會。
有人問起我搞份綜合性收費報紙要多少錢? 我話啟動時三、五千萬就得，但出版之後，使費就大好多，條數要慢慢計。一張收費報紙，典型的成本係紙價、印刷加發行費一大項，人工另一大項，其餘就燈油火臘等其他費用。搞收費報紙人工加出報紙成本是兩個最大開支。
傳聞《晨報》請400人，以平均25000月薪計(已估得較低)，都要1000萬一個月，一年要1億2000萬，請注意400人做一張大型綜合性報紙，人數偏少，其他大報有700至900人，即使扣除印刷廠的100人，亦遠比傳聞中《晨報》的人手多，如何以少人鬥多人，已是一個大問題。
再講印刷等費用，傳聞《晨報》出紙20萬，以大報出紙5至6叠計，印刷發行等相關成本要約6元一份，即是120萬元一日，3600萬一個月，4億3800萬一年。當然，若出紙少一半得10萬一日，此部份開支就減半。兩項大成本相加一個月已經4600萬，再加其他濕碎成本，5000萬一個月都未必夠，一年要6億成本。即使減一半紙出10萬紙一日，一年開支都要3億8500萬，唔係細數目噃。呢個數完全無計自己起印刷廠，若要自己建廠，脆脆地另外要10億。
你可能會話，成本係咁多，但係會有收入。好理想咁講，一份報紙賣7元報館收4.2元(其餘由發行公司和報販、便利店收)，發20萬份如果賣到九成，一日收番76萬，一年咪收番2億7600萬囉，賣到咁多紙，再搵番3億幾廣告，發行收入加廣告收入，就頂到6億成本，咁咪可以打平賺錢囉。
記住呢個係理想，現實往往同理想有差別，《蘋果》非賽馬日都係賣17萬紙，你估話吓就賣到20萬份呀? 據資深報紙發行業人士話，《晨報》想賣到紙，唔止要平，仲要超平，人地賣7元一份，佢賣5元，甚至2元，就有少少可能去到紙。而按的報紙發行的行規，賣5元報館只能收3元，賣2元，仲要倒貼1元俾報販和發行商，即係話賣到2元一份時，唔止無發行收入，一年仲要貼7300萬，一年總開支上升到6億7300萬元! 幾時先至搵到6億幾廣告? 你話咁唔好賣咁平咪得囉，但賣正常價錢7元又去唔到紙，一樣係死喎。
《蘋果》95年創刊時就係用2元一份大燒錢的方法(當時其他報紙賣5元)，去打開市場，當年報業市場好好，《蘋果》亦好勁，非常賣得，廣告係咁流入，廣告價一年加咗三次，但佢都要花咗5億，先至去到經營打和的境地。《晨報》同當年《蘋果》比又點比呢?
搞報紙是一個燒大錢的遊戲，未創刊只俾人工幾百萬、1000萬一個月，都唔太恐怖，一開始出版，開機印報紙，就要4000、5000萬一個月成本，一個月只收到幾百萬廣告一啲都唔奇，一年輸4、5億就等閒事啦。仲要咁諗，你出招打人，唔可以預對手唔識還招，一打就係持久戰。《蘋果》20年前都要輸5億才打平，咁《晨報》有番10億在手，都可以玩吓呢個遊戲。
盧永雄
農曆新年後，茶餐廳齊齊加價，平均加幅5%至6%，高過通脹，市民見到茶餐廳加價，又聽聞財爺今年仲減派糖，真係唔開胃。
茶餐廳係普羅大眾最常去的「食堂」，唔少打工仔一日三餐都在茶餐廳搞掂。在中環灣仔這些比較旺的地區，食個午餐起碼40至50蚊，早餐便宜些，也要30蚊。一個月返工22日計，單係兩餐就超過1500蚊。以一個月入萬餘元的打工仔，單係兩餐就花去超過一成的工資。難挨也。
這是一個死局，因為，筆者私底下問過一些茶餐廳老板，加了價，亦唔覺得他們好賺錢。因為除非位處非常旺區，例如遊客區，或者商業區，加價不影響人流外，在普通地區，食物加了價，人流相對又會減少。更重要的是運作成本大幅上升，包括租金、人工及食材，都加得厲害。有老板娘話，魚肉以前每斤十幾元，現時已經漲到近一百元咁誇張。食品的加幅，遠遠追唔上營運成本的加幅，經營狀況，仲惡劣過以前。
從宏觀經濟睇，美國狂印銀紙，資產、原料及服務有限，而鈔票數量無限，印鈔令百物價格飆升，因此造成全球性通脹。香港係一個開放經濟，對於全球性的熱錢衝擊，基本上可以做的事情不多。
另一個造成本地百物騰貴的原因是多了好多內地遊客湧港。大量內地遊客訪港，增加擠迫，推高物價，這是「必要之惡」。有市民走去示威派傳單，話香港唔歡迎國內遊客。但這無疑係自殺行為，無遊客來港消費，香港經濟肯定仲衰。這是消極方法，並非一個出路。香港要調控旅客數量，而非趕客走。
那麼，價格飛漲之下，究竟誰人受益最大？推高物價的因素主要有三：工資、材料及租金。有茶餐廳老板呻，以前七千元人工有好多人應徵，現在出到一萬三都請唔到人。相對而言，工資上升，對廣大市民比較有利。但加幅比例以至絕對數目，卻係最最少的。而租金幾成幾成咁上升，得益的就只有業主，尤其係大財團受惠。例如領匯，擁有最多的的商場，得益亦最大。
從這個角度講，從租金入手，受打擊的只係財團同業主少數人。事實上，由於近期資產價格大幅上漲，即使收少些租金，對這些財團同業主的影響亦唔大。
政府又唔可以話做唔到任何嘢，因為理論上她有能力控制租金的上升，只要透過租金管制措施，壓制租金無休止及無限制的上升，就可舒緩物價上升的壓力，減少對普羅市民生活上的影響。
