農曆新年後，茶餐廳齊齊加價，平均加幅5%至6%，高過通脹，市民見到茶餐廳加價，又聽聞財爺今年仲減派糖，真係唔開胃。
茶餐廳係普羅大眾最常去的「食堂」，唔少打工仔一日三餐都在茶餐廳搞掂。在中環灣仔這些比較旺的地區，食個午餐起碼40至50蚊，早餐便宜些，也要30蚊。一個月返工22日計，單係兩餐就超過1500蚊。以一個月入萬餘元的打工仔，單係兩餐就花去超過一成的工資。難挨也。
這是一個死局，因為，筆者私底下問過一些茶餐廳老板，加了價，亦唔覺得他們好賺錢。因為除非位處非常旺區，例如遊客區，或者商業區，加價不影響人流外，在普通地區，食物加了價，人流相對又會減少。更重要的是運作成本大幅上升，包括租金、人工及食材，都加得厲害。有老板娘話，魚肉以前每斤十幾元，現時已經漲到近一百元咁誇張。食品的加幅，遠遠追唔上營運成本的加幅，經營狀況，仲惡劣過以前。
從宏觀經濟睇，美國狂印銀紙，資產、原料及服務有限，而鈔票數量無限，印鈔令百物價格飆升，因此造成全球性通脹。香港係一個開放經濟，對於全球性的熱錢衝擊，基本上可以做的事情不多。
另一個造成本地百物騰貴的原因是多了好多內地遊客湧港。大量內地遊客訪港，增加擠迫，推高物價，這是「必要之惡」。有市民走去示威派傳單，話香港唔歡迎國內遊客。但這無疑係自殺行為，無遊客來港消費，香港經濟肯定仲衰。這是消極方法，並非一個出路。香港要調控旅客數量，而非趕客走。
那麼，價格飛漲之下，究竟誰人受益最大？推高物價的因素主要有三：工資、材料及租金。有茶餐廳老板呻，以前七千元人工有好多人應徵，現在出到一萬三都請唔到人。相對而言，工資上升，對廣大市民比較有利。但加幅比例以至絕對數目，卻係最最少的。而租金幾成幾成咁上升，得益的就只有業主，尤其係大財團受惠。例如領匯，擁有最多的的商場，得益亦最大。
從這個角度講，從租金入手，受打擊的只係財團同業主少數人。事實上，由於近期資產價格大幅上漲，即使收少些租金，對這些財團同業主的影響亦唔大。
政府又唔可以話做唔到任何嘢，因為理論上她有能力控制租金的上升，只要透過租金管制措施，壓制租金無休止及無限制的上升，就可舒緩物價上升的壓力，減少對普羅市民生活上的影響。
美麗華旅遊一個新春越南及海南島郵輪團，因為去不到越南下龍灣，變成一宗索償事件。民建聯立法會議員蔣麗芸，雖然不是跟旅行團，亦剛好是郵輪乘客之一，即時表現見縫插針的政客本色，成為民意代表，出晒大位。
旅客去不成下龍灣，旅程的確受損，要求賠償，無可厚非，至於賠多賠少，就見仁見智。但事件中最出位的地方，是郵輪泊岸時，以蔣麗芸為首的一批乘客，要求旅遊公司承諾賠償才肯落船。事件令下一批近二千多名旅客，延遲了十多個小時才能上船。
蔣麗芸外號「立法會元秋」，今次在傳媒鏡頭前攝位發言，口沫橫飛，訴說船上婆婆BB滯留苦況有之，美麗華旅遊如何無良剝削有之，就差一點未有聲淚俱下。
蔣麗芸今次可謂「新年爆騷，出盡風頭」。有人笑稱，連電影圈的「咖哩啡」，明知無工開，都要去片場露露面啦，更何況政客？不爭出位不上鏡，點會有運行呀。所以出位行為是議員的「必要之惡」，不能深責，但出位都要講少少原則吧？
麗芸姐作為民建聯的一員，一直都反對泛民「佔中」。反佔中的基本理念，就是反對一言不合就霸住某個場所，逼使對方就範的行為。旅客不滿意美麗華旅遊的賠償，無問題，可以用和平理性的手段繼續協商，甚至走到美麗華辦公的地方遊行抗議都得。但點解要佔住郵輪不肯落船呢？明知郵輪要接待下一班旅客，這不是擺明「劫持」郵輪來講數嗎？這和佔中有何分別?
麗芸姐在電台上，強調「佔領郵輪」與「佔領中環」是「兩件事囉」。她認為，不可將事件與佔領中環扯上關係，因為旅客有付款，但行程不對辦，他們只希望討回公道。主持人問她，佔中三子也是希望尋求公道，蔣麗芸認為兩者不同：「咁而家佢（政改）有個選擇，最緊要有個選擇，而家問題在佢（旅行團）個遊戲規則唔清楚。」
老實講，睇完麗芸姐的解釋，我「睇唔明囉」，所以亦搭不上咀。
麗芸姐在事件中成功出晒位，攞晒彩。但問題是她同時散播了一個非常不正確的理念：傾唔埋欄，就霸住對手的地方，逼對方就範。只求出位，不講原則，只求達到目的，不講過程的合法性合理性，此風不可長也。
盧永雄
