日本小鎮目標2020零廢物

香港幾個堆填區就嚟爆棚，政府經常話要源頭減廢。環保署2013年發表《香港資源循環藍圖》，目標2022年之前人均固體廢物棄置量減少40%，並且回收再用率要達到55%。呢個數字講起嚟好似好誇張，不過現實係做到架，只在乎大家有幾咁努力。睇睇日本一個小鎮嘅例子，自2003年開始減廢計劃，到2015年底回收率已經達到80%，更希望2020年真成實現全日本第一個零垃圾社區！

香港政府早年公布嘅目標數字：

20160107_BG_上勝町_零廢物 (1)

德島縣勝浦郡上勝町係一個只有1,700人嘅小社區。整個區內一個垃圾筒都無，但係居民公德心好到嚇親你，地上一件垃圾都搵唔到。每個居民都會將剩飯剩菜堆喺屋企，並且仔細將其他固體垃圾分成34類，自行帶垃圾到回收中心。回收中心會有職員確保所有垃圾置入正確位置。一班居民初時都好唔習慣分類得咁細，但係經過十幾年努力，人人都已經將回收廢物視為生活習慣，做慣咗就一啲都唔覺得麻煩。

小鎮內有社企將廢物修理再出售或者係循環再造。區內仲有公共空間俾居民可以免費交換二手物品。佢哋仲建立咗一間零垃圾嘅啤酒廠，廠房都係用再生物料建成，成為當地嘅標誌。

根據當地政府數字，上勝町垃圾回收率高達80%，餘下20%垃圾會以堆填方式處理，目標去到2020年達到零堆填，即係100%回收率。另外，廢物回收行業佔咗呢區接近23%嘅生產總值，而且仲有持續上升嘅趨勢。所以唔好話啲垃圾無用，夠醒目的話可以用嚟賺錢架！

有片段介紹呢個超勁小鎮：

最後梗係補返資料來源啦：

香港資源循環10年藍圖
This Japanese Town Shows How 'Zero Waste' Is Done

神州快訊

** 博客文章文責自負,不代表本公司立場 **

古希臘哲學家亞里士多德主張人一生目的在於追求「eudaimonia」，可以譯做幸福、活得好等等，至於如何活得好又係一個大問題。哈佛大學一項長達75年嘅研究似乎可以俾到少少啟示，指出良好人際關係可以令人活得健康快樂。至於所謂「良好人際關係」，其實不過三點：唔好孤獨、朋友貴精不貴多同埋用心維繫關係。

有關研究結果早於2009年已喺美國《亞特蘭大》雜誌發表。項目負責人哈佛精神病學博士Robert Waldinger上個月擔任TED Talk講者再次分享，話個研究早於1938年展開，跨越四研人員先作出結論。

佢哋多年嚟追蹤724個人，觀察每個人由青少年到老年嘅心態同行為變化。研究人員每年都會同佢哋進行身體檢查以及家訪，務求搵出「健康同幸福嘅關鍵」。博士介紹時表示，724個觀眾對象現在已經死得七七八八，只剩大約60人在生，位位都變成90幾歲嘅老人家。

觀察對象大致可以分成兩組人，一班係哈佛精英畢業生，出身同成長環境都好好。另一班人來自波士頓最困窮嘅地方，處於社會最低層。佢哋投身社會後喺各行各業打滾，有啲做工人、有啲做律師、醫生，最勁嗰個做咗美國總統；有人生活非常充實，有人終日沉醉喺酒精藥物；有人由社會最低層爬上頂層，亦有人從最高跌落最低。

經過75年，哈佛研究員得出一個結論：開心健康與否，同財富、個人成就以及名氣完全無關，唯獨良好人際關係先係關鍵。研究顯示同家人、社會以及朋友有更多聯繫嘅人往往更開心、更健康長壽。孤僻嘅人自然就無咁開心，中年後健康急速下降，大腦功能衰退更快。

值得注意嘅係，人際關係好壞同數量無關，而係在乎質量。就好似夫妻之間，若然相處唔和諧，對身心傷害程度比離婚更甚。研究對象中有自稱好幸福嘅夫妻話，身體80歲時難免會有疼痛，但係心情愉快日子都唔會難過。相反同伴侶相處唔愉快嘅人，身體疼痛會受情緒波動影響而加劇。良好人際關係仲可以維持大腦功能，覺得身邊有人可以依靠嘅人，比缺乏別人關愛嘅記憶力更持久。

博士最後講到，人人都鍾意「食快餐」，務求生活馬上變好，只可惜人際關係呢家嘢真係好複雜，需要以一生去經營。財富、名聲同埋成就無疑可以為人帶嚟一時滿足感，但係呢份虛榮感會隨時間流逝。歲月無情，研究經歷75年後，到老死一刻仍然活得開心嘅人，都一定有親密家人以及朋友在身邊。

《亞特蘭大》雜誌2009年文章〈What Makes Us Happy?〉
http://www.theatlantic.com/magazine/archive/2009/06/what-makes-us-happy/307439/

亞里士多德「eudaimonia」：
http://www.philosophybasics.com/branch_eudaimonism.html

建議睇埋呢篇：〈《尼各馬可倫理學》與儒家比較〉：
http://www.wangngai.org.hk/48-wong.html