25萬紅酒真定假 Fit馬叫記者「嗒真啲」

Fit馬馬時亨做咗港鐵主席，搞搞新意思，未通車的港島南線海洋公園站，變身燒烤自助餐派對場所。昨日天寒地凍，港鐵在那裏搞咗個BBQ自助餐，宴請傳媒。

Fit馬話做局長時，每年搞BBQ傳媒聚餐，都係佢自己俾錢，但今次就由港鐵總裁梁國權就話由港鐵埋單，馬主席就攞咗支12公升的2000年出產巨型紅酒，請傳媒友好飲餐飽。最搞笑的是佢叫在場人士嗒真啲，如果覺得係假酒，就走去搵民主黨「算帳」。

皆因支酒係Fit馬前年在民主黨籌款晚宴上，用25萬投到，而佢在2013年民主黨晚宴上，投得黃永玉的名畫，後來卻被作者的兒子揭發是贋品，事後卿姐主動退款30萬元兼致歉，所以Fit馬昨晚講笑咁話，若果是假酒，就要齊齊向民主黨追數了。

開派對的海洋公園站幾有海洋feel，八面玲瓏的Fit馬搞派對當然有氣氛，走勻全場，又識得跟貼時事講吓笑，話在港鐵站內筵開十席係「史無前例」，叫記者「打卡」影相，同人講時記住強調「我真係、真係嚟過架！」

有港鐵公關講笑咁話，馬主席面對傳媒回應港鐵的問題，佢哋都唔使準備sound bite(傳媒引述原話)，不過席間閒談，大家都認為未來港鐵面對的挑戰都唔細。

Ariel

** 博客文章文責自負,不代表本公司立場 **

立法會正審議俗稱「網絡廿三條」的《版權修訂條例》， 泛民發起拉布，令立法會運作近乎癱瘓，即使條例通過二讀，都唔係咁易過關。政務司司長林鄭月娥接受《星島日報》 訪問時批評，泛民的做法是對人不對事。 對於今個財政年度行將完結，立法會稍後就會審議有時間限制的《 撥款條例草案》及臨時撥款，林鄭承認情況對政府很不利，不排除為大局著想要抽起《版權條例》。

不過訪問出街後，引起不少迴嚮。林鄭昨日又改口話，政府目前沒有計劃抽起《版權修訂條例草案》。佢話，商務及經濟發展局局長蘇錦樑仍然非常努力推動，這條經過了適當程序，經過了立法會審議的版權修訂條例通過，因為版權持有人事實上，是非常期盼能夠通過這條條例。

議會中人話，林鄭講版權條例可能要抽起，其實是漏了口風。但而家泛民博命拉布，想搞死版權條例，林鄭此時在訪問承認可能要抽起， 對立法會建制派議員堅持開會的士氣，有很大影響，所以佢昨日才出來澄清。

不過亦要注意，林鄭係話「目前沒有計劃抽起」，只係講目前，這已為政府留了後路，必要時真係要抽時，都有下台階。而家立法會的建制派中，經民聯全力支持要通過，民建聯有點無可無不可，版權條例係唔係咁順利捱得過，仍有未知之數。