政事
財委會主席陳健波一直和泛民撐到行，剪布不手軟，但今日下午突然開記招，宣布不會主持財委會的高鐵追加撥款，改由副主席陳鑑林主持，令各方皆感意外。
陳健波上周主持財委會會議，通過港珠澳大橋追加撥款之後，已經比大舊陳偉業質疑，指佢有利益衝突，仲話要去廉政公署投訴。今次陳健波突然話唔主持會議審議高鐵嘅追加撥款，顯然係怕大舊再去廉政公署投訴。
陳健波在記者會上承認，自己在「慕尼黑再保險公司」出任受薪顧問，該公司將承保高鐵項目。雖然自己已作申報，亦符合立法會《議事規則》，但高鐵撥款充滿爭議，為免不必要疑慮，避免自己成為「拉布工具」，他決定不主持會議，亦不打算投票。
佢多番強調，《議事規則》要求議員申報的條文，並不適用於會議主席，又認為理論上自己可以主持港珠澳大橋及高鐵追加撥款會議。
自許仕仁案之後，有關公職人員失當的案件，追查甚嚴，陳健波都要好小心，以免誤墮網，所以避開主持高鐵會議，都係穩陣的行為。
Ariel
** 博客文章文責自負,不代表本公司立場 **
港珠澳大橋接近54億元追加撥款終於落幕，財委會主席陳健波勇字當頭「剪布」通過撥款，惹來泛民批評，相信佢都預咗，但建制派就覺得佢做得啱，再咁拖落去，咁多工程撥款及其他涉及民生的開支排晒大隊，分分拖死香港經濟發展。
一向同建制派若即若離的田大少，在表決後又喺facebook「抽水」。事緣會議當日，田少問過運輸及房屋局副局長邱誠武，大橋通車後可唔可以開車到珠海，但邱誠武就話應該先集中傾工程，通關同車輛限制的事遲啲再傾。
田少有啲「勞氣」，喺facebook留言話「究竟係邊個求邊個？局長依家教我問問題？不如坦坦白白答好過啦。」佢認為邱誠武只係識得「遊花園」咁喎！
不過今次田少抽水就未得到網友like，反而引嚟唔少人狙擊，因為田少當日會議並無投票，網友質疑田少點解唔投票。田少見辣著火頭，就解話說「所以我冇投票支持政府啦！」不過網友就似乎唔收貨，皆因田少黨友、即係自由黨主席鍾國斌當日投票支持撥款，有網民仲話「冇投支持好叻呀？！ 反對就投反對啦，做議員最唔負責任是不投票！」「你又唔投，抽乜野水姐你，慳d la」。
睇嚟田大少呢次抽水就係唔太成功喎，有時想兩邊討好，好高難度，搞到自己豬八戒照鏡，兩面不是人。
