「咬」一口蘋果 商標起一場革命

每間公司都有自己獨有的商標(Logo)，如果logo不是獨特的，就大鑊，被告侵權可大可小。不少logo的設計都以簡單為主，一個蘋果、幾條線、一個圓形加個頂。看起來就會想：「我都畫到啦！」

 

標誌設計的意念，離不開線條，驟眼看很簡單，實際上不是「兩三分鐘搞得掂嘅事」。手提電話被蘋果公司打了一場「革命」，原來商標設計都同樣被蘋果重擊一頓。

資料圖片

蘋果公司的「被咬一口的蘋果」夠簡單，但背後傳聞一個接一個。其中一個最有名的，是現代計算機科學之父的阿蘭圖靈(Alan Turing)，在50年代，因為同性戀被揭，之後在家中吃掉一個含氰化物的蘋果，上面就咬了那一口。蘋果logo是彩色的，就源於同性戀的彩虹旗，向圖靈致意。

當然這通通都被蘋果公司澄清了。事實總比美麗的故事簡單得多。敝除第一個蘋果公司vintage味道十足的logo，原始彩色的那個logo是由設計師Rob Janoff設計，他話為了找尋靈感，第一件事就買了個蘋果，二話不說就將它切開，於是標誌就設計好了，不過覺得有點像櫻桃，所以就給它「咬」一口。Rob Janoff最後保險給Steve Jobs兩個版本，以防他覺得「咬一口」那個太可愛。Steve Jobs最後選了「咬一口」，不過仍然有點疑慮。

網上圖片

 彩色，是因為Steve Jobs喜歡超出常理的東西，當時電腦公司的商標都有著非常高科技的感覺，所以高層當時自然大力反對，但最後Steve Jobs贏了。綠色在上，只是為了配合綠葉的顏色。

 

總結，「咬一口」為了不至蘋果像櫻桃；彩色，Steve Jobs喜歡。設計由第一次會議到出台，就兩個星期左右。

彩色logo一用就廿幾年，到1998年始，蘋果就轉了幾次色，輪廓都改變少許，之後就到現在銀色版本。千變萬變，離不開那「咬一口，為不像櫻桃」。 

似乎商標設計都因蘋果而起革命，首先蘋果自己都得要脫離繁複的設計，其首個1976年發表的「英國味、美國風」的logo，優雅，但複雜，儘管華盛頓同蘋果關係有多密切，放上一家公司的logo上，總顯得沈重。

顯然，老號都要為自己logo而煩惱，要轉logo都不是易事，畢竟別人就只認得那個logo，再看百事可樂(Pepsi)，就知設計者「頭都爆」，就只為簡約，不久之前又再轉了。

網上圖片

 一場「革命」，影響到商標設計的簡約化，亦隨科技繪圖技術發展，幾個圓形加直線幾何，就併湊無限個「商機」。

不過始終有人手繪畫紋章的堅持，是英國，皇室同政府機構的紋章全由英國倫敦紋章院人手繪畫，早前就發表了劍橋公爵、威廉王子與公爵夫人凱特的夫婦紋章。

回歸簡約是社會的根本，所有繁複過後，總覺得簡單的好。當然，「千祈唔好以為自己真係畫到咁『簡單』嘅logo！」

CY

** 博客文章文責自負,不代表本公司立場 **

「咩話？」「廣東話呀！」

廣東話嘅風波不斷，之前教育局就為「廣東話」向市民道歉。事源係教育局上個月上載咗一篇題為「語文學習支援」嘅文章，形容廣東話係「一種不是法定語言的中國方言」。禍不單行嘅係，網上更流傳教育電視短片，「妖魔化」粵語。

事件惹起市民對政府嘅憤怒，狠批政府「河蟹」廣東話，認為教育局特登「矮化」廣東話，更加話教育局曲解《基本法》中英雙語皆為法定語言嘅意思，要逐漸將廣東話淘汰。

廣東話講得出，更加寫得出，為此筆者就以「廣東話」寫呢篇文章。其實廣東話文字相當優雅，係古代早有詩人作家運用，但香港教育就從來無教過學生正寫正字。

筆者認識粵語文字就因為電話短訊同ICQ、MSN嘅興起，SMS如果仲要文皺皺，睇嚟唔多似係講緊嘢。呢個年代，手機不離身，What'sapp多過講電話，小學生都一人一部，老師唔教，咪自己學囉，但又半桶水，有音寫音，有邊讀邊，邊個啱邊個錯，「識鬼咩！」新一代年輕人又被批多懶音，兩者歸根咎柢都係香港教育失誤，無系統去教，咪錯囉！

好多我哋經常用嘅廣東話字，好似「嘅」、「係」、「諗」、「俾」、「嚟」同「佢」，多數人都唔知出處同正寫，喺度就介紹下。

「嘅」係的嘅意思，古正字係「忌」，同音，《詩經 鄭風》就有提到「叔善射忌，又良御忌」。「係」字更加文雅，有時喺畢業證書，都會寫到邊個邊個「係於」乜乜大學畢業，正正就係個「係」字，《三國演義》同《紅樓夢》都有使用。

做乜諗嘢個「諗」字，想嘅意思，《詩經 小雅》就提到「豈不懷歸，是用作歌，將母來諗」。「俾」字，給嘅意思，古正字係「畀」，而家兩個字都通行，《詩經 鄘風》提到「彼妹者子，何以畀之？」

「過嚟」嘅「嚟」字，其實就係嚟自「蒞臨」個「蒞」，同樣係來嘅意思，「蒞」係古正字，北宋王禹偁《揚州寒食》就話「今年蒞淮海，時節又清明」。

「佢」又係點嚟嘅呢？古字係「渠」，同樣係他嘅意思，東漢《孔雀東南飛》就有「雖與府吏要，渠會永無緣」。除咗呢啲常用字，仲有「打邊爐」、「傾偈」、「核突」等等，都有出處，有得寫。

香港有超過九成半人講廣東話，廣東話地位無容置疑，但香港教育無教不特止，仲要慢慢放棄廣東話，醜化之餘，仲要由正規文件中列明廣東話無地位可言，政府目的昭然若揭。

當廉潔係香港嘅核心價值都可以俾高官同前廉政專員湯顯明一撕就破，咁廣東話，自己嘅語言就嚟得更加珍貴，不保不可！

「咩話？」「廣東話呀！」呢兩句係小朋友世界經常出現嘅對答，連小學生都識答，政府仲可以有咩理由摒棄作為母語嘅廣東話。