博客文章
驚慄片嘅宣傳操作真係好大學問，每次有新戲上畫，總會標榜史上最恐怖電影，照咁推論咪越嚟越恐怖？
又一齣「史上」電影啱啱喺台灣橫空面世，戲名一個字《咒》，我有朋友睇咗，message霸戲哥話呢套真係堅有料，唔係純玩jump scare呢啲低手伎倆，好有舊時港產片《蜈蚣咒》、《邪》feel。仲話因為以台灣真人真事做藍本，喺高雄睇口感fit晒。
話說呢單嘢發生喺2005年，有姓吳嘅一家六口，先後標童致精神失常，話畀三太子、玉皇大帝、王母娘娘同七仙女上身，喺家中上演六國大封相自相殘殺，最尾仲互相餵屎，真係慘情。
成日話好玩唔玩玩食屎？如果《咒》入面真係去到咁激玩食屎，咁直頭係「屎上」最恐怖電影啦。
香港未有得睇，睇住trailer頂癮先啦。
《咒》預告片
霸戲哥
** 博客文章文責自負,不代表本公司立場 **
隨住科技進步，電影畫質越嚟越神，觀影感覺同八、九十年代嗰陣完全冇得比。
IMAX最近宣佈已着手開發下一代攝錄器材，預計2023年年尾推出。鍾意試新嘢同撚鏡頭嘅導演，又多咗選擇。
印象中霸戲哥第一次聽IMAX係2009年。James Cameron套《Avatar》（阿凡達）用咗IMAX 3D拍攝技術，令成個視覺官感唔同晒，加埋明星效應，人睇我又睇嘅心理下，真係名副其實一票難求，霸戲哥為入場差啲要食炒價。
不過講到最深刻嘅IMAX體驗，就一定要數Christopher Nolan套《Interstellar》（星際啟示錄，2014）。有幕Matthew McConaughey上太空，架太空船喺無重狀態下旋轉，配上詭異刺耳嘅音響，令你好似置身局促嘅太空船入面，跟住主角一齊轉。暈到呢。
據聞Christopher Nolan同Jordan Peele已表明有興趣試新嘢，不過最快都要等到2024年先有得睇。
唔知到時啲戲院開番未呢？定係已經冇晒戲院？
