霸戲哥之日常#043 │ IMAX

隨住科技進步，電影畫質越嚟越神，觀影感覺同八、九十年代嗰陣完全冇得比。

IMAX最近宣佈已着手開發下一代攝錄器材，預計2023年年尾推出。鍾意試新嘢同撚鏡頭嘅導演，又多咗選擇。

印象中霸戲哥第一次聽IMAX係2009年。James Cameron套《Avatar》（阿凡達）用咗IMAX 3D拍攝技術，令成個視覺官感唔同晒，加埋明星效應，人睇我又睇嘅心理下，真係名副其實一票難求，霸戲哥為入場差啲要食炒價。

不過講到最深刻嘅IMAX體驗，就一定要數Christopher Nolan套《Interstellar》（星際啟示錄，2014）。有幕Matthew McConaughey上太空，架太空船喺無重狀態下旋轉，配上詭異刺耳嘅音響，令你好似置身局促嘅太空船入面，跟住主角一齊轉。暈到呢。  

據聞Christopher Nolan同Jordan Peele已表明有興趣試新嘢，不過最快都要等到2024年先有得睇。

唔知到時啲戲院開番未呢？定係已經冇晒戲院？

霸戲哥

** 博客文章文責自負,不代表本公司立場 **

呢輪大家居家抗疫，又唔敢去飲茶，人都開始癲癲哋，呢日就聽到豬視妹喺度口噏噏⋯⋯

「燈櫈登等，職工頭圍用膳。」

聽豬視妹講，佢細個飲茶每次聽到呢句廣播，諸事八卦嘅佢，叉燒包食到一半都擺番落碗，走去昅吓人哋伙記食乜，當正自己有份食。

Those were good old days。以前酒樓當伙記一家人，成班工友圍埋食飯，頭圍、二圍、尾圍，拿拿聲食完又開工，勁有team spirit。可惜呢份人情味，依家已經買少見少。

不過，買少見少唔代表冇。

無綫J2台逢星期五晚10點播出嘅節目《職工頭圍用膳》，主持張寶兒同余思霆，會輪流介紹香港同台灣兩地包伙食嘅食肆，感受吓呢份暖暖嘅人情味。啱啱播出嗰集，仲有星級總廚Ricky同李文龍親自炮製福食，用下欄食物變上菜，睇到豬視妹舔舔脷。

「職工頭圍用膳完畢，快啲返回崗位，等櫈燈櫈。」豬視妹又催我出post啦。